Тошкент шаҳрида бундан 19 йил олдин содир этилган жиноят иши бўйича айбланган 43 ёшли фуқаро 17 йилга қамалди. Бу ҳақда «Халқ сўзи»га пойтахт судидаги манбаси хабар берди.

Билдирилишича, бугун, 13 июнь куни Жиноят ишлари бўйича Шайхонтоҳур тумани судида 43 ёшли Р.М.нинг 19 йил олдин содир этган қотиллиги бўйича жиноят иши кўриб чиқилган.

Суд ҳужжатларига кўра, Тошкент вилоятининг Янгийўл туманида жойлашган ҳарбий қисмда станция бошлиғи лавозимида ишлаб келган 24 ёшли йигит (19 йил аввал) Тошкент шаҳридаги кафеларнинг бирида 19 ёшли Д.Б. (аёл) билан танишиб қолиб, у билан ишқий муносабатга киришган. Улар ўзаро муносабатлари мобайнида икки маротаба жинсий яқинлик қилган.

Шундан сўнг Р.М.да ҳолсизлик, жинсий аъзоларининг яллиғланиши каби касаллик белгилари пайдо бўлган. У 2005 йил август ойи бошларида Мудофаа вазирлигининг марказий ҳарбий клиник шифохонасига мурожаат қилган. 24 ёшли ҳарбий хизматчида тиббий-лаборатория таҳлилларидан кейин ўткир бактериал уретрит ва тери-таносил касалликлари туркумига кирувчи ганорея касаллигини аниқлаган.

Шундай бўлсада, у Д.Б. билан бўлган ишқий муносабатларини давом эттирган. Марҳума билан бирга яшаган ҳамда қўшмачилик билан шуғулланган аёлнинг Самарқанд вилоятига кетганидан фойдаланган эркак яна аёлнинг ёнига борган.

Р.М. Д.Б. билан тўртинчи маротаба жинсий алоқада бўлгач, аёлга ундан касаллик юқтириб олганини айтиб, аёлнинг хизмати учун берилиши лозим бўлган 200 минг сўм пулни бермаган. Шундан сўнг аёл билан жанжал чиққан.

Тергов ҳужжатларида келтирилишича, эркак аёлнинг ҳақоратли ва беҳаё сўзларига чидай олмасдан, уни пичоқлай бошлаган. Д.Б.нинг бўйин ўнг ён қисмига бир маротаба, бош чап чакка-пешона, чап юз қисмига йигирма икки маротаба, пастки жағости чап қисмига бир маротаба, кўкрак қафасининг чап томонига бир маротаба, қорин девори олд ва ён қисмларига беш маротаба, кўкрак қафасининг ўнг томонига ўн икки маротаба, кўкрак қафаси орқа томони ўнг куракости ва бел соҳаларига саккиз маротаба, ўнг сон қисмига ўн бир маротаба, умумий ҳисобда ҳаёт учун хавфли бўлган жами олтмиш бир маротаба пичоқ билан тан жароҳати етказиб, уни ўта шафқатсизларча қасддан ўлдирган.

Судда сўз олган судланувчи айбига иқрорлигини, қилмишидан пушаймонлигини айтиб, виждон амри билан айбини тан олганини, тергов пайтида айбига ўзи иқрор бўлганини билдирган.

«Халқ сўзи» манбасига кўра, суд 43 ёшли Р.М.га нисбатан узил-кесил 17 йил озодликдан маҳрум қилиш жазосини тайинлаган.