Токио-2020: Ўзбекистон пара дзюдо мусобақаларида умумжамоа ҳисобида 2-ўринни эгаллади

18:49 30 Август 2021 Спорт
394 0

Токио-2020 ёзги Паралимпия ўйинлари доирасида пара дзюдо дастури ўз ниҳоясига етди.

Эътиборлиси, пара дзюдочиларимиз 2 та олтин, 2 та кумуш ва 2 та бронза медалларини қўлга киритган ҳолда умумжамоа ҳисобида 2-ўринни эгаллашди.

Шу ўринда таъкидлаш лозим, пара дзюдо бўйича Ўзбекистон терма жамоаси Токио-2020 ёзги Паралимпия ўйинларига жами 12 нафар спортчи билан йўл олган эди. Шулардан 7 нафари эркаклар, 5 нафари аёллар.

Афсуски, Токиога етиб боргач, 3 нафар пара дзюдочимиз – Лобар Хуррамова, Севинч Салаева ҳамда Васила Алибоевада коронавирус инфенкцияси аниқланди ва шу сабабли улар мусобақада иштирок эта олишмади. Яна бир спортчимиз Шуҳрат Бобоев эса бронза медали учун беллашувни давом эттираётган эди, бироқ кутилмаган жароҳат туфайли у ҳам курашдан чиқди. Ўта оғир вазнда юртимиз шарафини ҳимоя қилган Ширин Шарипов эса ҳакамлар томонидан рақибига нисбатан қоидага зид усулни қўллагани учун дисквалификасия қилинди. Ваҳолангки, унда ҳам медаль олиш имконияти юқори эди.

Шунга қарамасдан, татамида ҳақиқий ирода намойиш эта олган Ўзбекистон пара дзюдочилари умумжамоа ҳисобида Буюк Британия, Эрон ва Бразилия каби терма жамоаларни ортда қолдиришга эришди.

Паралимпия ўйинларининг пара дзюдо мусобақаларида ғолиб ва совриндор бўлган спортчиларимиз:

Эркаклар

-66 кг: Учқун Қуронбоев – олтин,

-73 кг: Феруз Сайидов – олтин,

-81 кг: Довурхон Кароматов – кумуш,

-100 кг: Шариф Ҳалилов – бронза.

Аёллар

-57 кг: Парвина Самандарова – кумуш,

-63 кг: Нафиса Шерипбоева – бронза.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?