Яккасарой туманида тадбиркорнинг 420 млн сўмлик товарларини қўлга киритган фирибгарга нисбатан жиноят иши қўзғатилди. Бу ҳақда Бош прокуратура Матбуот хизмати хабар берди.

Қайд этилишича, Бош прокуратура ҳузуридаги Департаментнинг Яккасарой туман бўлими томонидан тадбиркорлик субъектларининг ҳуқуқ ва манфаатларини ҳимоя қилиши юзасидан ўтказилган терговга қадар текширувда, фуқаро А.Н. “A.F.”  ва “G.M.” МЧЖлари раҳбарларига ҳар бирига ўзини гўёки ушбу жамият вакили деб таништириб, шу йўл билан уларнинг ишончига кириб, жамиятлар ўртасида қиймати 480 млн сўмлик тиббий воситаларини олди-сотдиси бўйича шартнома расмийлаштиришга эришиб, ушбу шартномага асосан “G.M.” МЧЖдан олинган 420 млн сўмлик тиббий воситаларни нақд пулга сотиб, ўз эҳтиёжларига ишлатиб юборганлиги аниқланган.

Мазкур ҳолат юзасидан А.Н.га нисбатан Жиноят кодексининг 168-моддаси 4-қисми билан жиноят иши қўзғатилиб, тергов ҳаракатлари ўтказилмоқда.