Жорий йил 1 июндан бошлаб “божхона омбори”, “бож олинмайдиган савдо дўкони” ҳамда “эркин омбор” фаолияти билан шуғулланишга рухсат этувчи лицензиялар амал қилиш муддати чекланмаган тарзда берила бошлади. Илгари бундай лицензиялар божхона органи томонидан чекланган муддат, яъни 5 йилга тақдим этилар эди...

Тошкент шаҳар божхона бошқармаси томонидан “Чуқурсой” ташқи иқтисодий фаолият божхона постида тадбиркорлар иштирокида ўтказилган сайёр учрашувда шу ва бошқа янгиликлар хусусида атрофлича маълумот берилди.

Президентимизнинг “Тадбиркорлик фаолияти соҳасидаги лицензиялаш ва рухсат бериш тартиб-таомилларини янада қисқартириш ва соддалаштириш, шунингдек, бизнес юритиш шарт-шароитларини яхшилаш чора-тадбирлари тўғрисида”ги ҳамда “Ўзбекистон Республикаси Давлат божхона хизмати органлари фаолиятини тубдан такомиллаштириш чора-тадбирлари тўғрисида”ги фармонларига кўра, тадбиркорлик фаолияти соҳасидаги бир неча турдаги рухсатномалар буткул бекор қилиниб, лицензияланадиган фаолият ва рухсат бериш тартиб-таомилларининг айрим турлари бирлаштирилди. Баъзи рухсатномалар марказлашган тартибда эмас, балки ҳудудлар берилади. Жорий йил 1 июндан бошлаб божхона ишига тегишли қатор рухсат бериш тартиб-таомиллари бекор қилинди.

Ташқи иқтисодий фаолият иштирокчилари божхона брокерларига мурожаат қилмасдан божхона юк декларацияларини Интернет тармоғи орқали реал вақт режимида тўлдириш ва божхона органларига тақдим этиш имконига ҳам эга бўлишди.

Тадбирда тизимдаги коррупция ва тамагирлик ҳолатларига қарши курашишда жамоатчилик кўмаги зарурлиги ҳам алоҳида айтиб ўтилди.