Гулистон тумани марказидаги «Юрт байроғи» майдонида Президентимизнинг беш ташаббуси ижроси доирасида «Санъат олами» деб номланган концерт намойиш этилди.

Тўғри, ушбу мусиқий кечага юртимизда кунда-кунора ўтаётган шу каби дастурлар сирасидан, хабарлар хроникасида эса одатдагидек, ўхшаш ахборотлардан бири деб баҳо берилса ҳам бўлади. Аммо ундай эмас.

Гап шундаки, «Санъат олами» ҳар жиҳатдан — бадиий-мусиқий ишланмаси пишиқ-пухталиги, ижро маҳорати, репертуарининг ранг-баранглиги, техник таъминоти, хусусан ёритишдаги тўкислик ҳамда саҳна безакларининг жозибадорлиги билан катта концертлардаги сингари томошабинларнинг олқишига сазовор бўлди. Ва чекка ҳудудларда ҳам мусиқий намойишларни пойтахтдаги сингари мукаммал ташкил қилиш мумкинлигини амалда кўрсатди.

Бундай эътирофли натижага эришишда аввало дастур бадиий раҳбарининг ижодий ёндашуви энг муҳим омил ҳисобланади. Тадбир режиссёри ва бадиий раҳбари Иззатой Ўролова ҳали жуда ёш бўлсада,бу масъулиятли вазифани бекаму кўст адо этган десак, муболаға бўлмайди. Устоз кўрган бу истеъдодли маданият ходими «Сирдарё наволари» ансамбли таркибида Хитой, Ҳиндистон, Жанубий Кореяда ўзбек санъатини муваффақиятли намойиш этишда иштирок этган. Туман ва вилоят миқёсида ўтказилган кўплаб маданий тадбирларни ташкил қилишда бевосита қатнашиб,озми, кўпми касбий кўникмасини шакллантирган. Унинг айни салоҳияти «Санъат олами» концертида яна бир бор намоён бўлди.

Асосий ижролар Иззатой Ўролова бадиий раҳбарлик қилаётган «Ҳумо» ва «Бойчечак» болалар рақс ансамбллари томонидан адо этилган бўлса, меҳмонлар — «Ниҳол» давлат мукофоти совриндори Дилшод Каримов, Зулфия номидаги давлат мукофоти соҳибаси Мадинабону Мамированинг чиқишлари концерт мавқенинг янада оширди.

Айни пайтда ушбу дастур Иззатой Ўролованинг кўплаб маданият ходимлари сингари унга ҳам кўрсатилган ишончни жонкуярлик, фидойилик ва соҳага бўлган юксак масъулияти билан оқлаш учун астойдил ҳаракатда эканлигининг амалдаги намунаси бўлди. Яъни Президентимизнинг туман ва шаҳарларда айни йўналишда фаолият юритаётган, иқтидорли ходимларни имтиёзли равишда талабаликка қабул қилиш бўйича илгари сурган ташаббусига кўра Иззатой шу йил бошида Тошкент маданият ва санъат институтининг сиртқи бўлими талабаси бўлди.

— Икки йил ўқишга киролмадим, лекин олий маълумотли маданият ходими бўлиш мақсадим қатъий эди, — дейди Иззатой Ўролова, — Шукрки, Президентимизнинг юксак эътибори туфайли ўзим истаган соҳа талабаси бўлдим. Эндиги орзуим келгусида халқимизга бундан-да катта тантанали тадбирларни тортиқ этишда бевосита иштирок этиш. Бу ниятимга етишимда институтда олаётган сабоқларим бош омил бўлади, албатта.

Аҳмадали ШEРНАЗАРОВ
(«Халқ сўзи»).