24 январь куни Тошкент шаҳар ҳокимлигида пойтахт ҳокими ўринбосари Ш.Раҳмонов Яқин Шарқ ва Марказий Осиё мамлакатлари билан ҳамкорлик бўйича директор Эрван Хуард бошчилигидаги Groupe Casino компанияси (Франция) вакиллари билан учрашди.

Ш.Раҳмонов меҳмонларни самимий кутиб олиб, улар билан учрашиб турганидан хурсанд эканлигини таъкидлади. Мамлакатимизда фаолият юритаётган йирик чакана савдо тармоқлари ҳақида гапирар экан, Groupe Casino ҳам Ўзбекистонда муносиб ўрин эгаллаши мумкинлигини айтиб, ёртимизда чакана савдо бозорининг жадал ривожланиши бизнес учун ноёб имкониятларни тақдим этишини маълум қилди.

Э. Хуард самимий қабул учун миннатдорчилик билдирди ва гипер-, супер- ва минимаркетларнинг кенг тармоғига эга бўлган энг йирик француз чакана савдо тармоқларидан бири бўлган Groupe Casino ҳақида маълумот берди. Меҳмон Тошкент шаҳрида савдо тармоғини очишдан манфаатдор эканлигини таъкидлаб, пойтахт ҳокимлигининг кўмагига умид билдирди.

Конструктив ва дўстона мулоқот руҳида ўтган учрашув якунида ҳокимлик вакиллари хорижий компанияни қўллаб-қувватлашга, хусусан, Ўзбекистон Республикаси Савдо-саноат палатасининг ҳудудий бўлими кўмагида маҳаллий ҳамкорлар билан учрашув ташкил этишга тайёр эканликларини маълум қилдилар.