Шу йилнинг 31 май куни 40 ёшли эркак Ш.В. Навоий вилояти ИИБ бошлиғининг номига ариза билан мурожаат қилиб, таниш аёли шарманда қилиш йўли билан қўрқитиб 1 миллион сўм пул талаб қилаётганлигини маълум қилди.

Аниқланишига кўра, Ш.В. 34 ёшли ушбу аёл билан 2022 йил август ойидан буён яқин муносабатда бўлиб келган. “Муносабат”лар совугач, аёл ўртадаги сирлар сақланиши ва яқинликлар ошкор бўлмаслиги ҳамда СМС ва “Телеграм” орқали ёзишмалар ҳамда бошқа маълумотлар яқин қариндошларга етказилмаслиги эвазига шу кунга қадар Ш.В дан 4,5 миллион сўм пул олган.

Ш.В. ўз аризасида аёлга нисбатан қонуний чора кўришни сўраган.

Ариза асосида Навоий вилояти ИИБ ходимлари томонидан ўтказилган тезкор тадбир давомида ушбу аёл Навоий шаҳридаги “Фауна” кафесининг орқа томонида ариза муаллифидан 1 млн сўм пулни олган вақтда тадбир иштирокчилари томонидан ушланди.

Айни пайтда мазкур ҳолат юзасидан аёлга нисбатан Ўзбекистон Республикаси Жиноят кодекснинг 165-моддаси 1-қисми (товламачилик) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.

Темур ЭШБОЕВ, “Халқ сўзи”.