Ўзбекистон Республикаси Президентининг «2020-2023 йилларда Қорақалпоғистон Республикасини комплекс ижтимоий-иқтисодий ривожлантириш чора-тадбирлари тўғрисида»ги қарори ижросини таъминлаш, амалга оширилаётган ишлар ва инвестиция лойиҳаларини рўёбга чиқаришда учраётган муаммоларни ўрганиш мақсадида Олий Мажлис Сенати Фан, таълим ва соғлиқни сақлаш масалалари қўмитаси раиси Одилжон Иминов Қўнғирот туманида бўлди.

Сенатор тумандаги йирик «Қўнғирот сода заводи» МЧЖнинг ишлаб чиқариш ҳажми, маҳсулотларнинг сифати ва ишчилар учун яратилган шароитларни кўздан кечирди.

Бундан ташқари, ҳудудда рўёбга чиқарилиши лозим бўлган инвестиция лойиҳалари ҳам диққат марказида бўлди. Хусусан, нефть-кимё саноати ҳамда чорвачилик соҳаси бўйича умумий қиймати 6,5 трлн. сўм бўлган 160 та лойиҳани амалга ошириш ҳисобига 1737 та янги иш ўрни яратиш белгиланган.

Сенат аъзоси тумандаги «ЎзКоргазкемикл» қўшма корхонасида ҳам бўлиб, у ерда олиб борилаётган янги лойиҳалар билан танишди.

Шунингдек, инвестицион лойиҳалар истиқболлари, Қўнғирот тумани экспорт салоҳиятини ошириш масалалари ҳамда соҳадаги муаммоларни ўрганди.