Саминжон ҲУСАНОВ/«Халқ сўзи». Шу йилнинг 14 июль куни Қирғизистон Республикасининг Ўш вилоятида юзага келган табиий офат натижасида Андижон вилоятидаги «Оқ бўйра сой» кўприги қулаб тушди. Бунинг натижасида ушбу ҳудудда истиқомат қилувчи маҳаллалар инфратузилмасига жиддий зарар етди. Айни пайтда масъул корхоналар томонидан муаммоларнинг ижобий ечимини таъминлаш юзасидан тегишли чора-тадбирлар кўрилмоқда.

— Кўприк қулаши натижасида унга ёндош бўлган ичимлик сув қувури ҳам узилиб кетган, — дейди «Андижон сув таъминоти» АЖ бош муҳандиси Ҳумоюн Алимов. — Оқибатда Жалақудуқ туманидаги Бештол, Ҳамза, Тош ҳовуз, Хўжаобод туманидаги маҳаллаларда истиқомат қилувчи салкам 20 минг нафарга яқин аҳолига хизмат кўрсатиш сифати пасайган. Айни пайтда қайта қувур тортиш ишлари олиб борилмоқда. Қурилиш ишлари тез орада якунига етгач, таъминот тўлиқ тикланади. Унга қадар маҳаллаларга ичимлик суви махсус транспорт воситаларида етказиб берилмоқда.

Ҳозирда Хўжаобод туманидаги Қамбар ота сув иншооти орқали Жалақудуқ туманидаги ҳудудларга ичимлик суви етказиб бериш бўйича амалий ишлар давом этмоқда.