Фото: Видеодан кадр

Ижтимоий тармоқларда Ички ишлар органи ходими фуқароларни калтаклаётгани тасвирланган видео тарқалди. ИИВ матбуот котиби Шоҳруҳ Ғиёсовнинг «Халқ сўзи»га маълум қилишича, ҳолат 9 июнь куни Самарқанд вилоятида содир бўлган.

Вилоят ИИБ ахборот хизмати раҳбари Жаҳонгир Саъдуллаевнинг билдиришича, фуқароларга нисбатан амалдаги қонунчиликка зид равишда жисмоний куч ишлатган ходим тизимдан бўшатилган.

Унинг аниқлик киритишича, видеода тасвирланган ходим Самарқанд шаҳар бўйича ИИО ФМБ профилактика инспектори С.Э. бўлиб, у жорий йилнинг 9 июнь куни жамоат тартибини сақлаш, фуқароларнинг хавфсизлигини таъминлаш мақсадида тунги хизматга жалб қилинган.

С.Э. ўша куни соат 22:00 ларда шаҳарнинг Даҳбет кўчасидаги автомобиль йўлининг қатнов қисмида фуқаролар жанжал қилаётганлигини кўриб, уларни 6-сон ИИБга олиб бориб, уларнинг содир этган қилмишини расмийлаштириши давомида, профилактика инспектори ва ушбу шахслар ўртасида келишмовчилик юзага келган.

Жараёнда профилактика инспектори икки нафар фуқароларга нисбатан (улардан бири аёл) амалдаги қонунчиликка зид равишда жисмоний куч ишлатган.

Ҳолат юзасидан хизмат текшируви ўтказилиб, профилактика инспектори С.Э. ички Ишлар органлари сафидан бўшатилган.