Италиянинг “Ювентус” клубининг португалиялик ҳужумчиси Криштиану Роналду Англиянинг “Манчестер Юнайтед”га ўтиш учун ойлик маошини камайтиришга ҳам рози. Бу ҳақда “Football Italia” нашри ёзмоқда.

Футболчининг “Ювентус” билан амалдаги шартномаси 2022 йилнинг ёзида ниҳоясига етади. Аммо Роналду шу йилнинг ёзида кетиш ҳақида ўйламоқда. Aйни пайтда у “Ювентус”да йилига 31 миллион евро ишлаб топмоқда.

Нашрнинг ёзишича, футболчи камида 20 миллион евро тўланадиган бўлса ҳам “Манчестер Юнайтед”га ўтишга рози. Инглиз клуби аллақачон футболчининг агенти Жорже Мендес билан боғланиб, трансфер шартларини муҳокама қилган.

Роналду 2003 йилдан 2009 йилгача “Манчестер Юнайтед” шарафини ҳимоя қилган. Клуб таркибида у уч марта Aнглия чемпионлигини, мамлакат Кубогини ва Суперкубогини қўлга киритган. Икки бор Лига кубогида зафар қучган. Шунингдек, Чемпионлар лигаси ва клублар ўртасидаги жаҳон чемпионатида ғолиб бўлган.

Роналду 2018 йилда Испаниянинг “Реал Мадрид” клубидан “Ювентус”га ўтган эди. Жамоа таркибида у Италиянинг икки карра чемпионига айланди. Ушбу мавсумда португалиялик ҳужумчи Италия чемпионатининг 28 учрашувида қатнашди. Унинг ҳисобида 25та гол ва учта голли узатма бор.