«Давр банк» АТБнинг ташқи рекламасида кредит бўйича қўшимча шартлар ва муҳим маълумотлар кўрсатилмагани аниқланди. Бу ҳақда Рақобат қўмитаси хабар бермоқда.

Қайд этилишича, Рақобат қўмитаси томонидан ўтказилган ўрганишлар давомида, «Давр банк» АТБ томонидан эълон қилинган ташқи рекламаларда «Davr mobile» иловасида 50 млн сўмгача онлайн микрокредит» мазмунидаги реклама ахбороти берилганлиги аниқланган. Бу рекламада микроқарзнинг 43 фоиз йиллик устамаси, ойлик иш ҳақи талаб этилиши каби талаблар кўрсатиб ўтилмаган.

Шунингдек, Тошкент шаҳридаги LED мониторли реклама объектларида «Тадбиркорлар учун 5 миллиард сўмгача кредит, 24 фоиздан» мазмунидаги рекламалар жойлаштирилган бўлиб, аслида фоиз ставкаси – 32,99 фоизлиги маълум бўлган. Бундан ташқари кредит бўйича қўшимча шартлар ва муҳим маълумотлар ташқи рекламада кўрсатилмаган.

Юқоридагиларга кўра, «Реклама тўғрисида»ги ҳамда «Истеъмолчиларнинг ҳуқуқларини ҳимоя қилиш тўғрисида»ги Қонунлар талаблари бузилиш аломатлари юзасидан «Давр банк»га нисбатан молиявий жарима қўлланди.