Қорақалпоғистон Республикасида аҳоли, айниқса, ёшлар ўртасида кийиниш маданияти тарғиботини ташкил этишга қаратилган «Нафосат» фестивали ўтказилди.

Ушбу фестиваль бугунга қадар бир неча вилоятларда ва туманларда ўтказилиб, ҳудудлардаги юзлаб истеъдодли дизайнерлар ва ёшларни бир неча кунга бўлса-да, бирлашиб ўзаро фикр алмашишларига шароит яратди.

«Нафосат» фестивали, аҳоли, айниқса, ёшлар, тадбиркорлик, дизайнерлик соҳасида фаолият олиб бораётган хотин-қизлар, чет эллик меҳмонлар томонидан жуда катта қизиқиш билан кутиб олинди.

Унда 600 дан ортиқ ёш дизайнерлар, ҳунармандчилик, тўқимачилик ва дизайн соҳасида ўз бизнесини йўлга қўйган, янги ўзбек брендини яратаётган тажрибали соҳа вакиллари иштирок этдилар ва ўзаро тажриба алмашдилар.

Фестиваль доирасида бўлиб ўтган давра суҳбатлари, ижтимоий сўровлар, миллий ва замонавий мода кўргазмалари ёш авлоднинг, хотин-қизларимизнинг замонавий мода, кийиниш маданияти, миллий анъаналар ҳақидаги фикрларини яна бир бор ўрганиш ва ҳақиқий ҳолатга баҳо бериш, улар орасидаги янгидан янги қобилият эгаларини топиш имконини берди.

Унда Олий Мажлис Сенати ва Ўзбекистон Республикасининг Гендер тенгликни таъминлаш масалалари бўйича комиссияси аъзолари, Қорақалпоғистон Республикаси Вазирлар Кенгаши, «Ижтимоий фикр» республика жамоатчилик фикрини ўрганиш маркази, Ёшлар ишлари агентлиги Қорақалпоғистон Республикаси бошқармаси, «Ўзтўқимачиликсаноат» уюшмаси мутасаддилари, соҳа мутахассислари ва ёш дизайнерлар ҳамда оммавий ахборот воситалари вакиллари иштирок этди.

Тадбирда Олий Мажлис Сенати Раиси Т. Нарбаева иштирок этди ва нутқ сўзлади.

Фестиваль доирасида «Ёшлар модаси, анъаналар ва замонавий йўналишлар» мавзусида давра суҳбати ўтказилиб, унда бугунги кунда мода соҳасидаги янгиликлар, келгусида мазкур йўналишни янада ривожлантириш борасидаги режалар, қолаверса, дизайнерлар томонидан миллийликни ўзида мужассам этган ижод намуналарини яратиш ва уларнинг тарғиботини олиб бориш тўғрисида ўзаро фикр алмашилди.

Шунингдек, «Замонавий ўзбек аёлининг имижи» мавзусида аҳоли ва ёшлар ўртасида сўровнома ҳамда суҳбатлар, Қорақалпоғистон Республикаси Мўйноқ шаҳрида ёш дизайнерлар ва рассомлар ўртасида миллий ҳамда замонавий эскизлар чизиш бўйича танлов, маҳаллий ва хорижий дизайнерлар, ёшлар ҳамда мутахассислар иштирокида матбуот анжумани ва бошқа кўплаб тадбирлар ўтказилди.

Бундан ташқари, Қорақалпоғистон Республикаси дизайнерлари ва ҳунармандлари томонидан яратилган миллий ва замонавий либослар кўргазмасининг очилиши бўлиб ўтди.

Фестивалда Қорақалпоғистон Республикаси, Хоразм, Бухоро вилоятлари етакчи брендлари ва дизайнерлари томонидан тайёрланган «Замонавий ўзбек модаси, анъаналар ва янги дизайнлар» модалар намойиши ҳам йиғилганларнинг диққат марказида бўлди.

Тадбир давомида ишлаб чиқариш корхоналари фаолияти тўғрисидаги видеоролик намойиш этилди ҳамда «Хотин-қизлар ва ёшларнинг кийиниш маданияти» мавзусида семинар-тренинг ўтказилди. Соҳанинг етакчи мутахассислари томонидан ўзбек миллий модасини шакллантириш, ёшлар ўртасида миллий қадриятларимиз ва анъаналаримизга бегона бўлган оммавий маданиятнинг салбий оқибатларининг олдини олиш бўйича фикрлар билдиришди.