Бугун аксарият юртдошларимиз хорижда, хусусан, Россия Федерациясида меҳнат қилмоқда. Афсуски, уларни ижтимоий ҳимоя қилиш чоралари кўрилмаган. Бироқ, олиб борилаётган хайрли ишлар натижасида келгусида бундай бўлишига йўл қўйилмайди. Хусусан, Андижон вилоятида хорижда меҳнат қилишни хоҳловчилар учун махсус Мигрантлар тайёрлаш маркази ташкил этилмоқда. Бунинг учун собиқ коллеж биносини марказга мослаштириш ишлари олиб бориляпти. Қолаверса, хорижлик иш берувчилар билан ҳамкорлик алоқалари ўрнатилмоқда. Жумладан, Россия Федерацияда ҳамюртларимизнинг қонуний меҳнат фаолиятини ташкил этиш, уларнинг ҳуқуқий, ижтимоий муҳофазасини таъминлаш борасида бир қанча ишларга асос солинди. Россия халқлар дўстлиги университети ваколатхонаси раҳбари А. В. Колесников ҳамда Малака ошириш ўқув марказининг бош директори Ю. В. Насоновларнинг Андижон вилоятига ташрифидан кўзланган мақсад ҳам шу масалалар ижобатига қаратилган.

Россиялик ҳамкорларнинг вилоят ҳокими Шуҳратбек Абдураҳмонов билан музокараси давомида иш берувчиларнинг бўш иш ўринлари ҳақидаги талабномаларини Ташқи Миграция Масалалари Агентлигининг Андижон вилоятидаги филиалига топшириш масаласи кўриб чиқилди. Шунингдек, келгусидаги ҳамкорликнинг асосий йўл харитаси ишлаб чиқилди.

Айтиш жоиз, келишувлар натижасида дастлаб 4,5 минг нафар юртдошларимиз Россия Федерациясига қонуний тарзда ишлаш учун юборилади.

Саминжон ҲУСАНОВ,
«Халқ сўзи» мухбири