Фото: Тошкент шаҳар ҳокимлиги матбуот хизмати

Тошкент шаҳрида шаҳар ҳокимлиги ҳамда Ўзбекистон Республикаси Ёшлар ишлари агентлиги Тошкент шаҳар бошқармаси ҳамда 200 нафар истеъдодли ижодкорлар томонидан «Тошкент ёшлар карнавали 2022» ташкил қилинди.

Карнавалда республика ҳудудидаги ёшларни бир сафда жамлаш билан биргаликда, мамлакатимиз ҳудудидаги бошқа давлат элчихоналари билан бўлган алоқани яхшилашга алоҳида эътибор қаратилган.

Карнавалда 20 дан ортиқ олий таълим муассасаси талабалари, халқаро тоифадаги дизайнерлар, мудофаа вазирлиги оркестри, халқаро тоифадаги фотомоделлар, ижтимоий тармоқларда шахсий блогини юргизувчи таниқли блогерлар, халқаро миллий-маданий марказ вакиллари, спортчилар, махсус шоу гуруҳлари каби 30 дан ортиқ соҳа вакиллари жам бўлишган.

— Олдинлари кўплаб фестиваль ва галаконцертларга боришни канда қилмасдим. — деди Хоразмдан ташриф буюрган меҳмон Хорун Ўринов. — Лекин бугунги кун ҳаётимнинг энг унутилмас онлари сифатида хотирамда бир умр сақланиб қолса керак. Бугун ўзимни Америка карнавалларида қатнашаётгандек ҳис қилдим очиғи.

Таъкидлаш жоизки, бугунги карнавал ҳақиқатда ўзгача руҳда ўтди, ҳар бир инсоннинг қалбига қувонч, юзига табассум улаша олди.

Раҳматжон БОБОЖОНОВ, «Халқ сўзи».