Ҳиндистоннинг Харьян штати Фаридобод шаҳрида “Surajkund Mela” — дунёнинг энг йирик ҳунармандчилик фестивалининг тантанали очилиш маросими бўлиб ўтди, унда Ўзбекистон шерик-мамлакат сифатида иштирок этмоқда. Бу ҳақда Туризмни ривожлантириш давлат қўмитаси хабар берди.
Тадбирда Ҳиндистон Президенти Рам Натх Ковинд, Харьян штати бош вазири Манохар Лал Кхаттар, Харьян ва Химачал Прадеш штатлари губернаторлари, дипломатлар, ОАВ ҳамда жаҳоннинг 40 давлатидан ташриф буюрган иштирокчилар ҳозир бўлишди.
Очилиш маросими фестивалнинг асосий кўчаси бўйлаб тантанали юришдан бошланди, у ерда, шунингдек, Ҳиндистон ва иштирокчи-давлатлар мусиқачилари ва фольклор жамоалари чиқишлар қилишди. Ҳиндистон Президенти Рам Натх Ковинд Ўзбекистон павильонида тўхтаб, мамлакатимизнинг ҳунармандчилик ва амалий санъат экспозицияси билан яқиндан танишди ҳамда ҳунармандларимиз билан суҳбатлашди.
 

Президент очилиш маросимида қатнашар экан, “Surajkund Mela” фестивали Ўзбекистоннинг бой маданияти ва анъанавий санъати билан яқиндан танишиш учун ажойиб имконият бўлганини таъкидлади.
“Ҳиндистон ва Ўзбекистон ўртасида чуқур маданий ҳамда дипломатик алоқалар йўлга қўйилган. Давлатларимиз умумий географик чегараларга эга бўлмаса-да, бизнинг дилларимиз жуда яқин. Маданият ва санъат соҳаларидаги узвий ҳамкорлик одамларни яқинлаштириб, халқларимиз ўртасидаги дўстлик ва эзгулик алоқаларини мустаҳкамлайди”, — деди у.

Бундан ташқари, Ҳиндистон Бош вазири Нарендра Моди ўзининг Twitterʼдаги аккаунтида Ўзбекистонга ушбу фестивалдаги иштироки учун миннатдорчилик билдирди: “Бугун Ҳиндистон Президенти Рам Натх Ковинд очиб берган Surajkund Mela” фестивалида Ўзбекистонни шерик мамлакат сифатида кўришдан бахтиёрман. Ўзбекистон Президенти Шавкат Мирзиёевга шундай ташаббусларни илгари сураётгани учун самимий миннатдорчилик билдираман, зеро, бу хислатлар Ўзбекистон ва Ҳиндистонни янада яқинлаштиради”, — деб ёзилган сурат остида.
Харьяна штати вазир ўринбосари Вижай Вардхон Ҳиндистон аҳлининг Қўқон ҳунармандчилик фестивалида Ўзбекистон Президентининг ҳунармандчиликни қўллаб-қувватлашга нақадар юксак эътибор қаратаётганига ишонч ҳосил қилганини қайд этиб, айнан шу жиҳат Осиёнинг энг йирик фестивали “Surajkund Mela 2020”да Ўзбекистонни шерик-мамлакат сифатида танлашга ундаганини маълум қилди.
 

Ўзбекистоннинг Ҳиндистондаги фавқулодда ва мухтор элчиси Фарҳод Арзиев ҳам ўз чиқишида шундай деди: “Ҳиндистон раҳбариятига Ўзбекистонни шерик давлат сифатида таклиф қилганлиги ҳамда делегациямизга кўрсатилаётган меҳмондорчилик учун катта миннатдорчилик билдирамиз. Ўзбекистоннинг “Surajkund Mela”да шерик-мамлакат сифатидаги иштироки рамзий маънога эга, зеро, ўтган йили Ўзбекистон дунёга ўзининг Қўқон шаҳрида бўлиб ўтган Халқаро халқ амалий санъати фестивалини намойиш қилди. Биз ҳунармандчиликни қўллаб-қувватлаш ва тарғиб қилиш орқали ёш авлодга ижодий фикрлашни ўргатамиз ҳамда мамлакатларимиз меросидаги энг сара жиҳатларни намойиш этамиз”, — деди элчи.
Фестивалга ташриф буюрган Ўзбекистон делегацияси 100 га яқин кишидан ташкил топган бўлиб, уларнинг орасидан “Ҳунарманд” уюшмаси вакиллари, амалий санъат усталари, Ўзбекистоннинг барча ҳудудлари дизайнер ва заргарлари, шунингдек, Самарқанд, Бухоро ва Хоразм мусиқачи ҳамда фольклор жамоалари ҳамда ошпазлари ўрин олган. 
Таъкидлаш жоизки, “Surajkund Mela” фестивали 16 февраль кунига қадар давом этади. Илк кунларда халқ сайиллари 100 мингга яқин кишини қамраб олди. Дунёнинг 40 мамлакати ҳамда Ҳиндистоннинг деярли барча штатлари ҳамда тарихий, маданий ва туристик ҳудудлари ўз павильонлари билан иштирок этмоқда. Фестиваль якунига қадар меҳмонлар сони 1,5 миллион кишига етиши кутилмоқда.