2025 йил 24-25 февраль кунлари Саудия Арабистонининг Ар-Риёд шаҳрида 4-Халқаро гуманитар форум бўлиб ўтди. Унда Стратегик ва минтақалараро тадқиқотлар институти (СМТИ) директори Элдор Арипов раҳбарлигидаги Ўзбекистон делегацияси иштирок этди.

KSrelief ва БМТ томонидан ташкил этилган ушбу форум глобал гуманитар муаммоларни муҳокама қилиш, инсонпарварлик соҳасидаги халқаро ҳамкорликни кенгайтириш ва инновацион ечимларни ишлаб чиқишга қаратилган. Тадбирда халқаро ташкилотлар вакиллари, экспертлар ҳамда давлат арбоблари қатнашди.

Форумнинг «Реабилитация ва реинтеграция: қийинчиликларни енгиш ва имкониятларни излаш» сессиясида сўзга чиққан Элдор Арипов Ўзбекистон томонидан амалга оширилаётган «Меҳр» инсонпарварлик миссияси доирасида қуролли можаролар ҳудудларидан қайтарилган фуқароларни ижтимоий мослаштириш бўйича миллий тажрибани тақдим этди. 2019 йилдан бери давом этаётган ушбу миссия орқали 530 дан ортиқ фуқаро, асосан аёллар ва болалар ватанига қайтарилган.

Қайд этилишича, қайтган фуқаролар учун кенг қамровли реабилитация дастури ишлаб чиқилган бўлиб, у тиббий, руҳий ва ижтимоий ёрдамни ўз ичига олади. Ушбу модель халқаро экспертлар томонидан самарали ечим сифатида эътироф этилган.

Тадбир давомида СМТИ раҳбари Ўзбекистон Республикаси Президенти ташаббуси билан ташкил этилган Марказий Осиё минтақавий экспертлар кенгаши фаолияти ҳақида маълумот берди. 2024 йилдан бошлаб БМТ Терроризмга қарши кураш бошқармаси ҳомийлигида иш бошлаган ушбу кенгаш суд-ҳуқуқ масалалари, ижтимоий қўллаб-қувватлаш ва экстремистик фикрларга қарши курашишда ўзаро тажриба алмашишга хизмат қилади.

Форумда Минтақавий экспертлар кенгашини халқаро компетенциялар марказига айлантириш ташаббуси илгари сурилди. Ушбу марказ глобал стандартларни ишлаб чиқиш, реабилитация дастурларини такомиллаштириш ва можаролар қурбонларини жамиятга қайта қўшишга кўмаклашиш билан шуғулланади.

KSrelief томонидан икки йилда бир марта ўтказиладиган Ар-Риёд Халқаро гуманитар форуми гуманитар соҳадаги долзарб муаммоларни муҳокама қилиш ва Барқарор ривожланиш мақсадларига эришишга қаратилган амалий ечимларни ишлаб чиқишга хизмат қилади.