Маълумки, 2021 йилнинг 18 май куни Бирлашган Миллатлар Ташкилоти Бош Aссамблеясининг 75-сессияси ялпи мажлисида Ўзбекистон Республикаси Президенти Шавкат Мирзиёев таклифига биноан Оролбўйи минтақасини экологик инновациялар ва технологиялар ҳудуди деб эълон қилиш тўғрисидаги махсус резолюция бир овоздан қабул қилинди. Бу хушхабар бутун халқимиз, айниқса Орол денгизи қуришидан кўпроқ азият чекаётган қорақалпоғистонликларнинг эртанги кунга бўлган ишончини янада оширди.

Бу ҳақда хабар топган хорижий ва маҳаллий оммавий ахборот воситалари вакиллари Мўйноққа ташриф буюриб, ҳудуддаги янгиликлар ва олиб борилаётган ислоҳотлар жараёнларини кенг ёритишга киришиб кетдилар.

Оролбўйидаги янгиланишлар билан оммавий ахборот воситаларини кенг таништириш мақсадида Мўйноқ туманига медиа-тур ташкил қилинди. Тадбирда юртимиздаги телеканалларнинг Тошкент шаҳридан ташриф буюрган бир қатор вакиллари, марказий ва маҳаллий нашрларнинг ҳудудий мухбирлари иштирок қилди.

Тадбир иштирокчилари дастлаб Мўйноқ туманидаги «Орол денгизи тарихи музейи»да бўлиб, экспонатлар билан танишди.

Мазкур музей дастлаб лепролог Уринбай Ескиркепов томонидан 1984 йил Мўйноқ туманининг Учсой қишлоғида ўлкашунослик музейи сифатида ташкил этилган. Президентимизнинг 2017 йил 28 февралдаги Мўйноқ туманини иқтисодий ривожлантиришга оид қарорлари асосида янги биноси қурилиб фойдаланишга топширилди. Орол денгизи атрофига туристларни кенг жалб қилиш, бунинг учун денгизнинг ўтмиши ва ундаги ҳайвонот ва ўсимлик дунёсини ҳамда ҳудуд аҳолисининг урф-одатларини оммага кенг таништиришда муҳим роль тутган музейда бугунги кунда 400 дан ортиқ экспонатлар мавжуд.

— Орол денгизида акулалар бўлмаган, лекин музейимизда уларнинг тишлари бор, — дейди «Орол денгизи тарихи музейи» ходими Махмуджан Айтжанов. — Сўнгги пайтларда Орол денгизи ҳудудида артемия изловчилари томонидан акулалар тишларини топмоқдалар ва улар музей экспонатлари орасидан жой олган.

Биз билган Орол денгизида акулалар бўлмаганини кўпчилик билади. Шу боис бўлса керак, музейда хорижлик ва маҳаллий энг кўп қизиқтирадиган экспонатлардан бири бу акулалар тишларидир. Биз, бу ҳақда маълумотларни излаб топишга ҳаракат қилмоқдамиз. Маълумотларга кўра ҳозирда топилаётган акулалар тишлари қадимда Каспий билан Орол бир бўлиб турган пайтлардаги даврга тегишли бўлиши мумкин.

Халқимиз орасида Орол денгизи ўрнидаги сув бир неча бор қуриб, қайта тўлган деган ривоятлар ҳам бор. Айтиш мумкинки, Оролда ўрнидаги сувда қачонлардир акулалар яшаган. Лекин, ҳозир топилаётган тишлари қайси даврга тегишли экани ҳали тўлиқ ўрганилмаган.

Медиа-тур иштирокчилари Мўйноқ туманидаги «Очиқ осмон остидаги кемалар музейи комплекси»га ҳам саёҳат қилдилар. Пойтахтлик журналистларнинг ҳудуддаги янгиланишлар билан танишиш жараёнлари давом қилмоқда.

Ғ.Отажонов,
«Халқ сўзи»