Саратон хасталиги ўлим хавфи юқори бўлган касалликлар рўйхатида етакчи ўринда туради. Сўнгги йилларда Ер юзида ушбу оғир дардга чалинган беморлар сони тобора ортиб боряпти.

Юртимизда ҳам мазкур касаллик ташхиси қўйилган беморлар йўқ эмас. Бу эса онкологик хасталикларни ўз вақтида ташхислаш ва даволаш, соҳага замонавий жарроҳлик амалиётларини кенг татбиқ этиш, бу орқали беморлар саломатлигини яхшилашни тақозо этади.

— Сўнгги йилларда Президентимизнинг онкологик хизматни ривожлантиришга доир 3 та қарори қабул қилинди, — дейди Республика онкология ва тиббий радиология маркази директори Мирзағолиб Тиллашайхов. — Жорий йил барча ҳудудлар учун мобил маммографлар харид қилинди. Айни пайтда мамлакатимиз бўйлаб аёллар ўртасида маммографик скрининг тадбирлари жадал олиб бориляпти.

Шунингдек, марказимизнинг барча филиалларида иммуногистохимиявий лабораториялар ташкил этилиб, улар камерал микроскоплар ва реактивлар билан таъминланди.

Муассасанинг ҳудудий филиаллари 2 та янги чизиқли тезлатгич, 11 та гамма терапевтик ва 7 та брахитерапия ускуналари билан жиҳозланди. Агар 5 йил аввал юртимизда атиги 5 та радиотерапевтик мослама мавжуд бўлган бўлса, ҳозир улар сони 25 тага етди. Жорий йил Ислом тараққиёт банки-2 дастури доирасида яна қўшимча замонавий нур терапия ускуналари сотиб олиш режалаштирилган.

Шу билан бирга, Ўзбекистонда Ҳамдўстлик давлатлари орасида илк бор 9-14 ёшли қизлар ўртасида инсон папиллома вирусига қарши эмлаш ўтказилиб, унинг қамрови 98 фоизга етди.

Халқаро ҳамкорликни ривожлантириш мақсадида етакчи хорижий клиникалар билан 27 та меморандум имзоланиб, ўтган 5 йил давомида онкологик муассасаларнинг 232 нафар мутахассиси етакчи хорижий клиникаларда малака ошириб қайтди. Муҳими, бу ишлар жорий йил ҳам давом этади.