Наманганнинг шимолий ҳудудида жойлашган Янгиқўрғон туманидаги Қизилёзи қишлоғи бетакрор манзаралари, соф ҳавоси билан эътиборни тортади. Кейинги пайтларда бу ерда ички туризм ривожлантиришга алоҳида аҳамият қаратилмоқда. Мазкур соҳадаги истиқболли лойиҳалардан бири Ғуломжон Бурхоновнинг оилавий корхонаси томонидан амалга оширилди. Тадбиркор тасарруфидаги 2 гектар майдонда ташкил этилган Ўнғор дам олиш маскани гастрономик этно сайёҳлик йўналишида хизмат кўрсатади. Бу ерда қисқа вақт ичида шинам ўтов уйлар, коттеж ва кемпинг типидаги меҳмон уйлари қурилди. Миллий анъаналар асосида тикланган 26 жуфт ўтов уй, айниқса,сайёҳларга маъқул тушиши табиий. Иккита катта-кичик ўтовдан иборат ҳовлиларда ўчоқ, қозон, мангал бор. Телевизор, музлатгич ва бошқа воситалар билан жиҳозланган хоналардаги пол остидан иситиш мосламаси қишда ҳам зарур ҳароратни таъминлаб беради. Кичиккина чўмилиш ҳавзаси эса ёзнинг иссиқ ҳавосида асқатади.

Дам олувчилар таомномасига бешбармоқ ва бошқа миллий таомлар, сузма, қурут, туршак, майиз, асал, қази сингари егуликлар, шифобахш қимиз киритилган. Дарвоқе, бу ерда вилоятда ягона пайнтбол майдони ҳам ишга туширилди.

— Лойиҳа ижроси учун банкнинг 5 миллиард сўм миқдордаги имтиёзли кредити ҳамда 2 миллиард сўм ўз маблағимизни сарфладик, — дейди оилавий корхона раҳбари Ғ. Бурхонов. — Бу билан йилига 20 мингдан зиёд меҳмонни кузатиш имконияти юзага келди.

Қудратилла НАЖМИДДИНОВ
(«Халқ сўзи»)