Иллюстратив фото

Канаданинг Алберта университети олимлари тана ҳароратининг ўртача кўтарилиши балиқларга бактериал инфекциядан тезда халос бўлишга ва шикастланган тўқималарни тиклашга ёрдам беришини аниқладилар.

Қайд этилишича, тана ҳароратининг ошиши тананинг инфекцияга нормал реакциясидир. Иситма туширувчи препаратлар иситма билан бирга келадиган ноқулайликни енгиллатсада, янги тадқиқот шуни кўрсатмоқдаки, улар иммунитет тизимига ҳам халақит бериши мумкин.

Тадқиқотчилар бактериал инфекцияга чалинган балиқларда сунъий равишда иситмани қўзғатдилар. Эътиборли жиҳати, уларнинг хатти-ҳаракати иситмаси бўлган одамларнинг хатти-ҳаракатларига ўхшаган.

Кузатишлар якунида олимлар иситмаси бўлган балиқлар иситмаси бўлмаган балиқларга қараганда тезроқ инфекциядан халос бўлишларини аниқладилар. Бундан ташқари, иситма яллиғланишни камайтирган ва касалликдан зарарланган тўқималарни тиклашга ёрдам берган.

Муаллифларнинг фикрича, ўртача кўтарилган ҳароратни сақлаш одамлардаги юқумли касалликларни даволашда фойдали бўлиши мумкин. Бундан ташқари, иситма иккиламчи тери инфекцияларининг олдини олишга ёрдам беради ва жароҳатни даволашни осонлаштиради.

Бироқ, олимлар бу хулосалар илмий жиҳатдан тасдиқланиши учун кўпроқ инсонларда тадқиқотлар ўтказиш кераклигини таъкидлашмоқда.