16 май куни Боку шаҳрида Озарбайжон умуммиллий етакчиси Ҳайдар Алиевнинг 100 йиллик юбилейига бағишланган Озарбайжон Республикаси парламенти — Миллий Межлисининг махсус мажлиси ўтказилди. Махсус мажлисга 26 та давлатнинг парламентлари раҳбарлари ва аъзолари, 4 та халқаро парламент ташкилоти вакиллари таклиф этилди. Тадбирда Олий Мажлис Сенати Раиси Танзила Нарбаева бошчилигидаги Ўзбекистон парламенти делегацияси ҳам иштирок этди.

Дастлаб парламент делегациялари Фахр хиёбонида Озарбайжон халқининг умуммиллий етакчиси Хайдар Алиев қабрига гул қўйиб, унинг хотирасига ҳурмат бажо келтирдилар.

Шундан сўнг Озарбайжон Республикаси Миллий Межлисида Ҳайдар Алиев шахси ва меросига бағишланган фотокўргазма билан танишилди.

Махсус мажлисда сўзга чиққанлар Хайдар Алиев ХХ асрнинг атоқли сиёсий ва давлат арбоби, мустақил Озарбайжоннинг асосчиси сифатида тарихдан жой олгани, унинг кўп қиррали фаолияти мамлакатни халқаро миқёсдаги нуфузини оширишга хизмат қилганига тўхталдилар.

Олий Мажлис Сенати Раиси Танзила Нарбаева ўз сўзида Озарбайжоннинг иқтисодий ва ижтимоий ривожланиши, миллат бирдамлиги шаклланиши ва миллий тафаккурининг тубдан ўзгариши Хайдар Алиев номи билан боғлиқ эканлигини таъкидлаб ўтди.

– Ўзбекистонда Хайдар Алиев хотираси юксак даражада қадрланишини таъкидламоқчиман. Ўзбек халқи йирик сиёсатчининг Ўзбекистон ва Озарбайжон ўртасидаги қардошлик ришталарини ривожлантириш ва мустаҳкамлашга қўшган ҳиссасини доимо ёдда тутади. Унинг хотираси юртимизда абадийлаштирилган. Бугун Тошкентнинг марказий кўчаларидан бирига Хайдар Алиев номи берилган, унинг ёрқин хотирасига ёдгорлик барельефи ўрнатилган. Бу ўзбек халқининг озарбайжон халқи миллий етакчисига бўлган юксак ҳурматининг ифодасидир — дея, алоҳида қайд этди Олий Мажлис Сенати Раиси.