Абдулазиз ЙЎЛДОШEВ/«Халқ сўзи». Нарпай туманидаги «Narpaytex» корхонаси 250 кишини иш билан таъминлади. Ушбу лойиҳанинг умумий қиймати 4 миллион доллар. Корхонанинг йиллик қуввати 1 миллион дона тайёр трикотаж маҳсулотларини ишлаб чиқаришга мўлжалланган.

— Корхонамизда ишчи ходимларга трикотаж маҳсулотларини тикиш бўйича машғулотлар олиб борилди. Айни жараёнга Туркиянинг етакчи корхоналарида фаолият олиб бораётган мутахассислар жалб этилган, — дейди корхона раҳбари Абдуворис Умаров. — Ҳозир ишчилар топшириқни мустақил ўзлари бажармоқда. Келгусида қўшимча замонавий ускуналар олиб келиб, яна 200 та янги иш ўрни яратилади. Ҳозирча маҳсулотларимиз ички бозорда сотилмоқда.

— Тикишни шу ерда ўзлари ўргатишди. Ҳозир уч, тўрт хил тикишни биламан, — дейди корхона ишчиси Нурниса Турсунова. — Корхонамизга замонавий тикув машинаси ва ускуналар ўрнатилган. Ишчи-ходимларни қулай шароитда ишлаши учун барча шароитлар яратилган.

Хориждан келтирилган замонавий технологиялар билан жиҳозланган корхонада ишлаб чиқарилган маҳсулотларни келгусида асосан, МДҲ давлатларига экспорт қилиш режалаштирилган.