Фото: Халқ сўзи

Бошқалар соғлигидан кўра ўз нафсини ўйлаган баъзи кимсалар томонидан сотувга чиқарилиши тақиқланган кучли таъсир этувчи дори воситаларини муомалага киритиш ҳолатлари тез-тез учраётгани кишини ташвишга солади. Бундай эгри ишлар аниқлангач, табиийки, ноқонуний товарларни йўқ қилиш билан боғлиқ тадбирлар амалга оширилмоқда.

Худди шундай, Наманган вилоят божхона бошқармаси тезкор ходимлари томонидан ўтказилган тадбирда бир гуруҳ шахслар яширин йўллар билан кучли таъсир этувчи 4011 дона «Тропикамид», 400 та "Regapen" дори воситаси ҳамда 1440 дона бир марталик суюқлик дори юборадиган мосламаларни олиб ўтишга уринишаётгани маълум бўлди. Ҳушёр ходимлар саъй-ҳаракати билан улар фаолиятига чек қўйилди.

Олиб борилган суриштирув-тергов давомида жиноий гуруҳнинг қилмишлари ўз исботини топиб, айбдорларга нисбатан суд ҳукми билан тегишли жазо тайинланди. Шунингдек, 270 миллион сўмлик дори воситаларини йўқ қилиш белгиланди.

Суд ҳукми ижроси таъминланиб, дори воситалари вилоят божхона, экология ва атроф-муҳитни муҳофаза қилиш бошқармаси ҳамда тегишли ташкилотлар ҳамкорлигида махсус печь ёрдамида йўқ қилинди.

Қудратилла НАЖМИДДИНОВ, «Халқ сўзи».