Фото: Reuters

Испания терма жамоаси ва «Барселона» клубининг собиқ футболчиси яна Каталонияга қайтиши мумкин.

«Mundo Deportivo» нашрининг ёзишича, айни пайтда Қатарнинг «Ал-Садд» клуби бош мураббийи сифатида ишлаётган Хави тез орада «Барселона»ни бошқариши кутилмоқда.

«Каталониялик собиқ футболчи «Барселона»ни бошқаришга рози бўлди», дейилади нашр хабарида.

Шу билан бирга, расмий тайинлаш учун томонлар бир нечта жиҳатлар бўйича келишиб олишлари керак. Биринчидан, Хавини «Ал-Садд» олдидаги мажбуриятлардан озод қилиш масаласини ҳал қилиши, иккинчидан, эса Хавининг мураббийлар штаби ва аъзоларининг маошини келишиб олиши керак.

Каталония радиостанцияси — «RAC1»ҳам Хавининг розилигини тасдиқлади. 

Ушбу манбанинг хабар беришича, испаниялик мутахассис халқаро ўйинлар учун танаффусдан сўнг «Барселона»ни бошқаришга киришади ва  21 ноябрь куни  жамоанинг «Эспанёл»га қарши ўйинида бош мураббий сифатида дебют қилиши мумкин. 

Хавер Эрнандес Креус (Хави) 1980 йил 25 январда Испаниянинг Террасса (Каталония) шаҳрида туғилган. Прфессионал футболдаги фаолиятини 1991 йилда «Барселона» ёшлар жамоасида бошлаб, 2015 йилгача ушбу клуб шарафини ҳимоя қилган. 2015-2019 йилларда эса Қатарнинг «Ал-Садд» клубида ўйнади ва фолиятини якунлагандан бўён мазкур жамоада бош мураббийлик қилмоқда.

Хави футболчилик фаолияти давомида Испаниянинг барча ёшдаги терма жамоалари шарафини ҳимоя қилган. Миллий жамоада 133 ўйин ўтказган футболчи 2000 йилда Сидней Олимпиадасида кумуш, 2009 йилда Жанубий Африка Республикасида ўтказилган Конфедерациялар кубогида бронза, 2010 йилда мазкур давлатда ташкил этилган жаҳон чемпионатида олтин, 2013 йил Бразилияда бўлиб ўтган Конфедерациялар кубогида кумуш ҳамда 2008 йилда Австрия/ Швейцарияда ва 2012 Полша/Украина уюштирилган Европа чемпионатларида бош совринни қўлга киритган.

«Барселона» сафида эса 8 марта мамлакат чемпиони бўлган, уч бор Испания кубоги, 6 марта Испания Суперкубогини, 4 марта Чемпионлар лигаси бош совринини, икки бор УЕФА Суперкубогини ва икки марта клублар ўртасидаги жаҳон чемпионати ғолиблигини қўлга киритган. «Ал-Садд» таркибида эса 2018/19 йилларда Қатар чемпиони бўлган.

27 октябрь куни кетма-кет муваффақиятсизликлардан сўнг Роналд Куман «Барселона» бош мураббийи лавозимидан озод этилган эди.