Фото: AP

Охирги бир ҳафта Америка Қўшма Штатлари сиёсати анча шов-шувли ўтди. Айниқса, президентликка номзод Дональд Трампга ўз тарафдорлари олдида ўқ узилиши кенг муҳокамаларга сабаб бўлди. Пайшанба оқшомида собиқ президент республикачилар олдида 90 дақиқа нутқ сўзлади. Унда у суиқасд ҳақида гапириб ўтди.

Трампнинг айтишича, у илоҳий аралашувлар билан тирик қолган. Ўша вақтда у иммиграция ҳақидаги жадвални кўриш учун бошини бироз бурган.

«Жадвални кўриш учун мен ўнг тарафга бурила бошладим ва бир оз кўпроқ бурилишни бошлашга тайёрланаётган эдим, аммо буни қилмаганим учун омадим кулди. Қулоғимга шивирлаш овоз эшитилди ва нимадир қулоғимга урилди. Бу фақат ўқ бўлиши мумкин дедим. Мен Худонинг инояти билан олдингизда турибман», дейди у.

Шунингдек, Трамп АҚШнинг амалдаги етакчиси Жо Байденни президентлар ичида энг ёмони эканлигини қўшимча қилган. Унга кўра, Байденнинг мамлакатга етказган зарарини тасаввур қилиб бўлмайди.

Нутқида Дональд Трамп жанубий чегара деворининг қолган қисмини қуришга ваъда берди. Шу билан бирга у озиқ-овқат маҳсулотлари 50, бензин 60-70 фоиз, ипотека ставкалари тўрт баравар кўтарилганини таъкидлади.

Унингча, инфляция америкалик сайловчилар учун асосий муаммодир. Байден 2021 йил январь ойида лавозимга киришганидан бери нархлар жами 20 фоизга ошган.