Ботир МАДИЁРОВ/«Халқ сўзи». Хотира ва Қадрлаш куни арафасида Марғилон шаҳридаги «Ижодкорлар боғи»да барпо этилган «Санъаткорлар хиёбони» тантанали равишда очилди.

Тадбирда Фарғона вилояти ҳокими Хайрулло Бозоров, вилоят фаоллари, ижодкорлар, нуронийлар, кенг жамоатчилик вакиллари ҳамда ёш авлод вакиллари иштирок этди.

Марғилон азалдан санъат ва маданиятнинг бой ўчоғи ҳисобланади. Бугунги кунда шаҳарда кенг кўламли қурилиш ва ободонлаштириш ишлари амалга оширилмоқда. Жумладан, «Янги Ўзбекистон» массивида Бурҳониддин Марғиноний номидаги халқаро илмий-амалий мажмуа, туризм маркази, «Отабек ва Кумуш уйи» каби лойиҳалар рўёбга чиқмоқда.

Президентимиз ташаббуси билан ташкил этилган «Ижодкорлар боғи»да барпо этилган «Санъаткорлар хиёбони» эса ўзбек санъати ривожига улкан ҳисса қўшган улуғ ижодкорларга бўлган юксак ҳурмат ва эҳтиромнинг ёрқин ифодасидир.

Шодиёна тадбирида миллий санъатимиз фидоийлари Юсуфжон қизиқ Шакаржонов, Уста Олим Комилов, Муҳиддин Қориёқубов, Тамарахоним, Ҳалима Носирова, Мукаррама Турғунбоева, Жўрахон Султонов, Маъмуржон Узоқов, Наби Раҳимов, Ҳамза Умаров, Муроджон Аҳмедов, Таваккал Қодиров, Берта Давидова, Гавҳар Раҳимова каби санъат арбобларининг номи ардоқланди.

— Халқимиз ардоғидаги бу устозлар ҳаёти ва ижоди мангуликка дахлдор, — дейди Ўзбекистонда хизмат кўрсатган маданият ходими, таниқли сўз устаси Ҳотамжон Ҳакимжонов. — Бугун уларнинг миннатдор руҳи шод бўлди. Ишонамизки, бу қутлуғ маскан келгусида санъат ва маданиятимиз ихлосмандлари, умуман олганда, халқимизнинг севимли гўшасига айланади.

Тадбир доирасида рамзий тасма кесилди. Меҳмонлар янги хиёбон ва унда ўрнатилган санъаткорлар бюстлари билан танишди. Шу билан бирга, санъат усталари ҳаёти ва ижоди ҳақида маълумотлар берилди, ёш ижодкорлар томонидан театрлаштирилган бадиий чиқишлар намойиш этилди.