Олий Мажлис Қонунчилик палатаси мажлисида халқ вакиллари Мактабгача ва мактаб таълими вазири Ҳ.Умарованинг «Мактабларда қўшимча ўқувчи ўрнини яратиш ҳамда мактабларнинг моддий-техник таъминотини мустаҳкамлаш борасида амалга оширилаётган ишлар тўғрисида»ги масала юзасидан Қонунчилик палатасининг парламент сўровига юборган жавобини атрофлича кўриб чиқди.

Парламент сўровига келган жавобда келтирилганидек, бугунги кунда юртимизда умумий ўрта таълим мактабида 6,3 млн. нафар ўқувчига 509 мингдан ортиқ ўқитувчилар таълим бериб келишмоқда. Мавжуд мактаблар қуввати 5,2 млн. ўқувчи ўрнини ташкил этади.

Шунингдек, 2022 йилда маҳаллий буджет ва ҳомийлик маблағлари ҳисобидан 70 та мактабда қурилиш-тиклаш ишлари амалга оширилди. Юртимиздаги 128 та хом-ғишт ва лой-пахсадан қурилган мактаб филиали республика буджети маблағлари ҳисобидан намунавий лойиҳалар асосида қайта барпо этилди. Ушбу ишлар натижасида 2022 йил якунига қадар 141 765 та янги ўқув ўринлари ва мавжуд 198 мингдан ортиқ ўқувчи ўринли бино-иншоотлар замонавий қиёфага келтирилди.

Қайд этилганидек, умумтаълим мактабларини 2022-2023 йиллар куз-қиш мавсумига пухта тайёрлаш мақсадида 1300 дан ортиқ обектларда жорий таъмирлаш ишлари амалга оширилиб, уларнинг иситиш тизимлари, иситиш қозонлари, биноларнинг том қисми ва эшик-деразалари таъмирланган бўлса, айримлари янгисига алмаштирилди.

Муҳокамаларга бой бўлган мажлисда депутатлар парламент сўровига жавобда кўтарилган масалалар бўйича атрофлича маълумотлар тақдим этилганини эътироф этди. Кун тартибидаги масала тегишли қўмитанинг доимий назоратида бўлиши қайд этилиб, парламент сўровига юборилган жавоб маълумот учун қабул қилинди.

Шу билан Олий Мажлис Қонунчилик палатасининг мажлиси ўз ишини якунлади.