Фото: Халқ сўзи

Шаҳрисабзда ҳунармандчиликнинг бир неча турлари, айниқса, каштадўзлик кенг ривожланган. Авваллари деярли ҳар бир хонадонда кашта тикилар, бу ишни кўпчилик аёллар билишарди.

Мен ҳам каштадўзликни болалигимда ўрганганман. Ўн беш ёшимдан буён эса бу иш билан мунтазам шуғулланиб келаяпман. “Ҳунарманд” уюшмаси аъзоси, “Мевазор-Саодат” ишлаб чиқариш кооперативи раҳбариман.

Бир пайтлар кашта тикиш мен учун шунчаки қизиқиш бўлган бўлса, бугун бу ҳунар ҳаётимнинг мазмунига айланиб кетган. Ҳунарим ортидан озми-кўпми элга танилдим, обрў-эътибор топдим. Дунёнинг кўплаб давлатларида ташкил этилган йирик фестиваллар, кўргазмалар, танловларда юртимиз номидан иштирок этиш бахтига муяссар бўлдим. Мамлакатимиздаги деярли барча ҳунармандчилик фестиваллари, кўргазмаларида қатнашиб келаяпман. Бундай тадбирлар биз ҳунармандлар учун тажриба алмашиш, қолаверса, ўз маҳсулотларимизни янада кенг доирада намойиш этиш имконини беради.

Мисол учун, Туркия, Хитой, Россия, Италия, Бирлашган Араб Амирликлари давлатларидаги кўргазмаларда қатнашиш асносида, маҳсулотларимизни экспорт қилишга, янги ҳамкорлар топишга эришдик. Юртимиздаги барча сайёҳлик ҳудудларига маҳсулот етказиб беришни йўлга қўйганмиз. Шу боис асосан хорижлик сайёҳлар учун мўлжалланган турли каштачилик буюмлари, аксессуарлар тикаяпмиз. Маҳаллий бозор учун эса асосан келинлар сепи учун жойнамоз, ёстиқ жилдлари ва бошқа турдаги буюмлар, либослар, бош кийимлари тайёрлаймиз. Хуллас, бугун маҳсулотларимизнинг бозори чаққон, қанча кашта тикишга улгурсангиз, шунча талаб бор.

Шу боис кашта тикиш билан бир қаторда ҳудуддаги ишсиз хотин-қизларга ҳунар ўргатиш бўйича ҳам иш олиб бораяпман. Ҳозирда кўпчилик шогирдларим бу ҳунарни мукаммал эгаллаб, мен билан тенгма-тенг меҳнат қилишмоқда. Шу ҳунар ортидан яхши даромад топаяпти.

Бундай ютуқлар ўз-ўзидан бўлмайди, албатта. Бу давлатимиз томонидан ҳунармандларни ҳар томонлама қўллаб-қувватлаш, миллий ҳунармандчилигимизни тарғиб этишга қаратилаётган юксак эътибор натижаси деб биламан.

Бу йил Тадбиркорлар куни арафасида Президентимизнинг тегишли фармойиши билан “Фаол тадбиркор” кўкрак нишони билан тақдирланишим эса биз – шаҳрисабзлик ҳунармандларнинг камтарона меҳнатига берилган юксак баҳо дейиш мумкин. Бу мукофот менга янада катта масъулият юклайди. Миллий каштачилигимиз довруғини дунёга ёйиш йўлида меҳнат қилишга, изланишга чорлайди.

Саодат НИЗАМОВА,

“Ҳунарманд” уюшмасининг Шаҳрисабз

шаҳар бўлими аъзоси, каштачи,

“Фаол тадбиркор” кўкрак нишони соҳибаси.