Фото: «Халқ сўзи»

Фарғона вилояти Бағдод тумани “Дашт” маҳалла фуқаролар йиғини аҳолиси кейинги йилларда томорқада иссиқхона ташкил этиб, лимон етиштириш борасида ўзига хос тажриба мактабини яратмоқда.  Айни пайтда маҳаллада мингдан ортиқ хонадоннинг қарийб 600 тасида иссиқхона мавжуд бўлиб, уларда лимон парваришланяпти. Томорқа ерларида деҳқончилик қилиш ноқулай, суғориш тизимида муаммолар бўлишига қарамай, маҳалла аҳли лимондан катта ҳосил олишга эришмоқда.

– Ички ишлар соҳасида ишлаб, нафақага чиққанимдан сўнг томорқамизда иссиқхона ташкил этдим,– дейди шу маҳаллада яшовчи Ҳасанбой Эргашев. – Бир сотих майдонда тўла ҳосилга кирган лимондан йилига 1,5 тоннагача ҳосил олиш мумкин. Шу йилнинг ўзида 3 сотих майдондаги лимондан  деярли 70 миллион сўм даромад олдим.   

Куни кеча маҳаллага ташриф буюрган Фарғона вилояти ҳокими Хайрулло Бозоров аҳолини қийнаб келаётган суғориш тизимини яхшилаш учун 4 та янги сув қудуғи қазиб берилишини таъкидлаб, бурғулаш харажатлари учун давлат томонидан субсидия маблағлари ажратилишини маълум қилди.

Ботир Мадиёров, “Халқ сўзи”.