Олий Мажлис Қонунчилик палатасининг Саноат, қурилиш ва савдо масалалари қўмитаси томонидан «Кўп квартирали уйларни бошқариш тизими такомиллаштирилаётганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси муҳокамасига бағишланган семинар ўтказилди.

Қайд этилганидек, бугунги кунда, амалдаги норматив-ҳуқуқий ҳужжатларда Кўп хонадонли уй-жой фондидан фойдаланишни назорат қилиш инспекциясига аниқланган ноқонуний қурилмаларни фақат мажбурий кўрсатма бериш ёки судлар орқали бартараф этиш ҳуқуқи берилган.

Лекин ўзбошимчалик билан барпо этилган ноқонуний қурилмаларни мажбурий тартибда бартараф этишга оид судларга аризалар тақдим этишда олдиндан давлат божи тўловидан озод этилмагани боис ушбу мазмундаги материалларни судларга тақдим этишда қийинчиликлар юзага келмоқда.

Шунингдек, бугунги кундаги амалдаги қонунчиликда уй-жой мулкдорлари ширкатлари юқорида қайд этилган хизматлар учун тегишли солиқ тўловларидан озод этилган бўлиб, бошқарув ташкилотлари фаолиятига нисбатан ушбу имтиёзлар татбиқ этилмаётгани турли келишмовчиларни юзага келтиряпти.

Муҳокама қилинаётган қонун лойиҳасида назарда тутилаётган нормалар орқали коммунал хизмат кўрсатиш соҳасида, шу жумладан кўп квартирали уйларни сақлаш ва ундан фойдаланишда қонунбузилиш ҳолатларини олдини олишга кўмаклашишда инспекция иштирокини янада кенгайтириш йўли билан кўп квартирали уйлардаги муҳандислик-техник коммуникацияларини, уйнинг конструктив қисмлари таянч қобилияти ва зилзилабардошлилигини сақлаб қолиш, энг муҳими, кўчмас мулк эгаларининг хавфсиз яшашига шароит яратилади.

Семинарда ушбу лойиҳанинг қабул қилиниши бошқарув органларининг молиявий барқарорлиги таъминланишига, шу жумладан кўп квартирали уйларни бошқариш тизимида рақобат муҳити яратилишига хизмат қилиши қайд этилди.

Депутатлар ҳар томонлама пишиқ-пухта, ҳаётий, халқчил қонунларни яратиш ва уларни қабул қилиш бугун ҳар қачонгидан ҳам муҳим масала эканлигини айтиб, қонун лойиҳасини янада такомиллаштириш бўйича бир қатор таклиф ва тавсиялар берди.

Якунда иштирокчилар томонидан кўтарилган барча саволларга мутасаддилардан батафсил жавоб олинди.

«Халқ сўзи».