Иллюстратив фото

Тошкент шаҳри, Наманган, Фарғона ва Андижон вилоятларида фуқароларни хорижий давлатларга ишга юборишни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, Департаментнинг Сергели тумани бўлими ҳамда ДХХ ходимлари ҳамкорлигида тезкор тадбир ўтказилган. Унда фуқаролар И.Қ. ва А.А. (муқаддам фирибгарлик жиноятлари учун судланган) фуқаро А.Т.нинг ишончига кириб, гўёки юқори лавозимда ишловчи танишлари орқали уни Америка Қўшма Штатларига ишга юбориши эвазига 22 минг долларни олган вақтида ашёвий далиллар билан ушланганлар.

Худди шундай, Департаментнинг Наманган вилояти бошқармаси ҳамда ДХХ ходимлари ҳамкорлигида ўтказилган тезкор тадбирда фуқаро Х.Т. фуқаро А.А. ва бошқаларни танишлари орқали Япония давлатига ишга юбориши эвазига аввалдан келишилган 32 минг доллардан 10 минг долларини олган вақтида ашёвий далиллар билан ушланган.

Шунингдек, Департаментнинг Фарғона шаҳри бўлими ва ДХХ ходимлари ҳамкорлигида ўтказилган тезкор тадбирда «Б.Г.» МЧЖ Фарғона филиали раҳбари Н.А. фуқаро А.А.га ўзини гўёки Ташқи меҳнат миграция агентлиги ходими сифатида таништириб, уни Жанубий Корея Республикасига ишга юбориши учун 10 минг доллар эвазига сертификат тайёрлаб беришини айтиб, шундан 5 минг долларини олган вақтида ашёвий далиллар билан ушланган.

Департаментнинг Андижон вилояти бошқармаси ва ДХХ ходимлари ҳамкорлигида ўтказилган тезкор тадбирда чет тилларни ўргатувчи «А.» ўқув маркази ходими Х.Ш. фуқаро Ф.О.ни Жанубий Корея Республикасига ишга юбориши учун «G1 виза» расмийлаштириб беришини айтиб, ундан 4,5 минг долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.