Жорий йилнинг 16 январь куни Президентимиз Шавкат Мирзиёев раислигида аҳолини энергия ресурслари билан узлуксиз таъминлаш чора-тадбирлари бўйича ўтказилган видеоселектор йиғилишида белгиланган топшириқлар ижроси доирасида Хоразм вилоятидаги барча маҳаллаларда вилоят, шаҳар ва туманлардаги сектор раҳбарлари, маҳалла раислари, ҳоким ёрдамчилари, ёшлар етакчилари ва хотин-қизлар фаоллари уйма-уй юриб, аҳоли ҳолидан хабар олмоқда. Маҳаллаларда саховат тадбирлари ўтказилмоқда. Бу ҳақида Хоразм вилояти ҳокимлиги матбуот хизмати хабар қилди.

Хусусан, Янгибозор тумани ҳокимлиги ва «Маҳалла» хайрия жамоат фонди туман бўлинмаси ҳамкорлигида Жайхун ва Ифтихор маҳаллаларида 100 кг палов дамланиб маҳалла аҳолисига тарқатилди. 90 дан ортиқ эҳтиёжманд оилаларнинг 300 нафарга яқин аъзоларига бепул кийим-кечаклар олиб берилди. 130 га яқин хонадонга озиқ-овқат маҳсулотлари тарқатилди.

Оиламизнинг барча аъзоларига иссиқ кийим-кечаклар берилди, - дейди Жайхун маҳалласида яшовчи Илҳом Хўжаев. – Бундан жуда хурсанд бўлдик. Бугунги совуқ кунларда маҳалламизда иссиқ овқат ҳам тарқатиляпти. Кўмир ва суюлтирилган газ ҳам вақтида етказиб бериляпти. Маҳалламизда фуқароларга яратилаётган шароитлардан жуда мамнунмиз.

Бу каби саховат тадбирлари вилоятнинг барча маҳаллаларида давом этмоқда.