Жорий йилнинг 16 — 20 ноябрь кунлари ўтказилаётган “INFOLIB-2020” IX Миллий ахборот-кутубхона ҳафталиги доирасида Маҳмуд аз-Замахшарий номли Хоразм вилоят ахборот-кутубхона марказида ҳам қатор тадбирлар ташкил этилди. 

Онлайн ҳафталикда шаҳар ва туманлар ахборот-кутубхона марказлари раҳбарлари, тилшунос олимлар, маданият ва санъат намояндалари, китобхонлар иштирок этяптилар. 

Ҳафталик доирасида Ўзбекистон Ёзувчилар уюшмаси вилоят бўлими қошидаги “Ёш ижодкорлар“ клуби ҳамда ахборот-кутубхона марказлари қошидаги «Китобхонлар клуби» аъзолари билан ҳамкорликда «Кўнгил кўзини очқувчи китоб» деб номланган онлайн давра суҳбати ташкил этилди. Шунингдек, Ўзбекистон миллий кутубхонаси мутахассислари томонидан ўтказилган «Ўзбекистонда нодир фондлар: сақлаш, каталоглаштириш ва мутахассислар малакасини ошириш», Россия давлат кутубхонаси билан ҳамкорликдаги «Кутубхоналарда электрон ресурсларни масофадан етказиб бериш ва кутубхоналараро абонемент: муаммо ва ечимлар» мавзуларида маҳорат дарсларида хоразмлик соҳа мутахассислари фаол иштирок этдилар. Ҳафталик доирасида семинар-тренинглар, китоб кўргазмалари, таниқли фан, маданият ва санъат намояндалари билан ижодий учрашувлар бўлиб ўтади.

Одилбек Одамбоев,
(«Халқ сўзи»)