Давлатимиз раҳбарининг 2018 йил 17-18 май кунлари Андижон вилоятига ташрифи давомида ҳудудларни комплекс ривожлантириш хусусида берган кўрсатмаси ижросини таъминлаш юзасидан Улуғнор туманида ҳам бир қанча ишлар амалга оширилмоқда. Бу борадаги ҳаракатлар кўлами айниқса, Вазирлар Маҳкамасининг «Улуғнор туманини 2018-2020 йиллар давомида комплекс ривожлантириш чора-тадбирлари тўғрисида»ги қароридан сўнг янада кенг тус олди. Жумладан, куни кеча туман санитария-эпидемиологик осойишталик ва жамоат саломатлиги марказининг янги биноси фойдаланишга топширилди.

— Масканда соҳага оид барча техник воситалар мавжуд бўлиб, мутахассисларнинг хизмат фаолиятини шакллантиришлари учун етарли шароитлар яратилди, — дейди вилоят СEО ва ЖС бошқармаси Матбуот хизмати ходими Ферузахон Хўжамбердиева. — Бу ҳудудда санитария ҳолатини яхшилашда муҳим аҳамиятга эга.

«Андижон ихлос қурилиш» масъулияти чекланган жамияти томонидан 2 млрд. 800 минг сўм маблағ эвазига олиб борилган қурилиш ва таъмирлаш ишларидан сўнг бино нафақат, соҳа учун қулай масканга, балки туман кўркига ҳам айланди.

Саминжон ҲУСАНОВ,
«Халқ сўзи»