Ҳанузгача ўзбек булбули дея таърифланувчи Ўзбекистон халқ артисти Ботир Зокировнинг ижодий меросини аҳоли, айниқса, ёш авлодга кенг тарғиб этиш, ватанга муҳаббат ва садоқат, миллий ва умуминсоний қадриятлар руҳида тарбиялаш мақсадида Ўзбекистон Республикаси Маданият вазирлигининг ташаббуси билан буюк санъаткор, бугунги кунда ҳам кўз ўнгимизда ёш тимсолда гавдаланувчи Ўзбекистон халқ артисти Ботир Зокиров хотирасига бағишлаб «Ботир Зокиров санъати давомчилари» республика кўрик-танлови эълон қилинган эди.

Кўрик-танлов 16 ёшдан 28 ёшгача бўлган ижодкор ёшлар ўртасида жорий йилнинг февраль-апрель ойларида уч босқичда ташкил этилиб, туман шаҳар босқичлари 4 – 25 февраль кунлари, вилоят босқичлари эса 9 – 18 март кунлари ўтказилди.

Куни кеча Маданият вазирлиги биносида Ўзбекистон халқ артисти Ботир Зокировнинг хотирасига бағишланган «Ботир Зокиров санъати давомчилари» республика кўрик-танлови ғолибларини тантанали тақдирлаш маросими бўлиб ўтди.

Ҳакамлар ҳайъатининг қарорига кўра, кўрик танлов ғолиблигига қуйидаги истеъдод эгалари муносиб деб топилди.

3- ўрин соҳиблари:

Мамадалиев Камрон Улуғбек ўғли (Наманган вилояти);

Жафарова Диёра Фарходовна (Самарқанд вилояти);

Тоғаев Жавохир Учқун ўғли (Қашқадарё вилояти).

2 –ўрин соҳиблари:

Муродов Жамол Истам ўғли (Бухоро вилояти);

Хакимова Малика Рустамовна (Тошкент шаҳри);

Энг юқори балл тўплаб 1-ўринга сазовор бўлган иштирокчи эса Сайдалиев Умаршоҳ Искандар ўғли (Жиззах вилояти) дея эътироф этилди.

Эслатиб ўтамиз мазкур кўрик-танлов илк бора ташкил этилмоқда.

Вилоят босқичларида муваффақиятли иштирок этган ижодкор ёшлардан 50 нафари якуний республика саралаш босқичида иштирок этиш ҳуқуқини қўлга киритган эди. Танловда ўрин олганлар тақдирлаш маросимида машҳур хонандалар билан дуэт куйлаш бахтига муяссар бўлдилар.