Жорий йилнинг 1 декабригача автомобилларга газ тўлдириш компрессор шохобчаларининг қайси бири ишлаётганини кўрсатувчи мобил илова ишга туширилади. Бу ҳақда Энергетика вазири Жўрабек Мирзамаҳмудов YouTubeʼдаги «Лолазор» подкастида маълум қилди.

Унинг таъкидлашича, мазкур иловадан фойдаланиш бепул бўлади. Фақат АГТКШлар ўзларининг қўшимча хизматларини кўрсатиш ва реклама мақсадида иловадан фойдаланмоқчи бўлса, бунинг учун ҳақ тўланади.

«Мен ўтган ҳафта давомида ўзимизнинг маҳаллий ёшлар билан, ИТ компаниялар билан кўришиб, шу тизимларнинг барчаси ҳақида гаплашдик. Фақат бир нарса бор — барча ёқилғи қуйиш шохобчалари хусусий. Биз ҳозир дастур устида ишлаяпмиз. Барчага тавсиявий шаклда берамиз», деди Мирзамаҳмудов.

Унинг қўшимча қилишича, вазирлик бу илова орқали қайси АГТКШга газ узатилаётгани ҳақидаги реал вақт маълумотларини акс эттиради.

«Бу бепул бўлади. Биз улар билан Энергетика вазирлиги орқали шартнома қилиб, тизимни ва иловани яратиб бериш бўйича келишувга эришдик. Фақат ўша ёқилғи қуйиш шохобчалари қўшимча хизмати учун ёки реклама учун мобил иловани ишлатса қандайдир тўлов мавжуд бўлади. Лекин ёқилғи қуйиш шохобчалари бу иловани ишлатиш ёки ишлатмаслиги ўзининг иҳтиёрида бўлади», дейди вазир.