UEFA Чемпионлар лигаси плей-офф босқичининг дастлабки учрашуви Мадриднинг «Реал» клуби учун муваффақиятли якунланди. «Қироллик клуби» «Манчестер Сити»га қарши баҳс олиб бориб, қийин кечган ўйинда 3:2 ҳисобида ғалаба қозонди. Учрашув давомида «Реал» икки марта ҳисобда ортда қолган бўлса ҳам, якунда иродали ғалабага эришди.

«Ман Сити» бош мураббийи Хосеп Гвардиола ўйиндан сўнг ўз жамоасининг муаммолари ҳақида гапириб, тизим олдингидек ишламаётганини тан олди. «Мен узоқ йиллардан бери «Манчестер Сити»да ишлайман ва бу жамоанинг бир қисмиман. Аммо айни пайтда мен жамоада юзага келаётган вазиятни енгиб ўтишда ёрдам бера оладиган нарсани таклиф қила олмаяпман. Бу натижаларга ҳаммамиз жавобгармиз. Айбни битта футболчига тўнкаш осон бўлар эди, лекин бу бемаънилик. Айб ҳаммамизда, энг аввало, менда», – дейди Гвардиола.

Мураббий шунингдек, жамоанинг ҳужумда етарлича самарали ҳаракат қилмаганини тан олди. «Улар тўп билан яхшироқ ҳаракат қилди, биз эса бироз асабийлашдик. Жавоб ўйинида ғалаба қозонишга ҳаракат қиламиз. Мадридга борамиз, устунликка эга бўлиш ва кейинги босқичга чиқиш учун рақибга мослашишга ҳаракат қиламиз. Винисиус Жуниор фантастик футболчи. Мухлислар кўтарган баннер уни янада яхши ўйнашига сабаб бўлган бўлиши мумкин», – дея Гвардиоланинг сўзларини келтиради «Sky Sports».

Қайд этиш керакки, «Etihad»даги мухлислар ўйин олдидан амалдаги «Олтин тўп» соҳиби Родрини табриклаб, «Stop crying your heart out» (Юракни эзиб йиғлашни бас қил) номли баннер кўтарган ва тўғридан тўғри бу Винига руҳий босим қилган.

Мадриднинг «Реал» клуби бош мураббийи Карло Анчелотти эса учрашувдан мамнунлигини билдирди. Тажрибали мутахассиснинг сўзларига кўра, жамоаси ўйинда ҳамма жиҳатдан устун бўлган.

«Мен хотиржамман ва, албатта, хурсандман. Биз икки ўйиндан иборат қарама-қаршиликнинг биринчисида яхши ўйин кўрсатиб, кичик устунликка эга бўлдик. Ўйин яхши ўтди, биз яхши ҳимояландик, ҳужумда самарали ҳаракат қилдик ва кўплаб вазиятлар яратдик. Футболчилар таслим бўлмади, бу эса ғалаба қозонишимиз учун етарли бўлди», – дейди Анчелотти.

Мутахассиснинг таъкидлашича, жамоанинг ҳужумдаги тўртлигининг ҳаракатлари самарали кечди ва бу «қироллик клуби»га иродали ғалабани таъминлашга ёрдам берди.

Мутахассисларнинг фикрича, «Манчестер Сити» учун Мадридда қабул қилинган мағлубият жамоанинг кейинги баҳсга бўлган ёндашувини ўзгартирмайди. Анчелотти ҳам бу ҳақда гапирар экан, «Сити» жавоб ўйинида янада фаолроқ ҳаракат қилишини тахмин қилди. «Бу шунчаки кичик бир устунлик. Биз жавоб ўйинига яхши тайёргарлик кўришимиз керак. «Сити» яхши ҳаракат қилди», – дея Анчелоттининг сўзларини келтиради «Marca».

UEFA Чемпионлар Лигаси плей-офф босқичининг жавоб учрашуви 19 феврал куни бўлиб ўтади. Ўша кунги баҳснинг натижаси иккала жамоа учун ҳам катта аҳамият касб этади.