Фото: ЎзА

Кеча пойтахтимиздаги «Халқлар дўстлиги» саройига туташ муаззам майдонда Ўзбекистон Республикаси Давлат герби қабул қилинган кун муносабати билан “Давлат герби – миллий юксалиш мужассам улуғвор Ватан тимсоли!” деб номланган маънавий-маърифий байрам тадбири бўлиб ўтди. Бу ҳақда ЎзА хабар берди.

Республика Маънавият ва маърифат маркази томонидан ташкил этилган ушбу тантанали тадбирга ижодкор зиёлилар, ҳарбийлар, талаба-ёшлар, ҳамюртларимиз таклиф этилди. Худди шу куни жазирама об-ҳаво ҳам тантанага хайрихоҳ бўлганидек, майин шамол майдон узра эса бошлади.

Анвойи гуллар, шарқираган биллур фавворалар, ҳар тарафда ҳилпираётган кўплаб байроқлар байрамга янада кўтаринкилик бағишлайди. Ўзбекистон Республикасининг Давлат мадҳияси янграйди. Она-диёримизнинг бош қўшиғини тадбирда иштирок этаётган барча қатнашчилар баралла, жўровозликда ижро этдилар. Республика Маънавият ва маърифат маркази раҳбари Минҳожиддин Ҳожиматов, Ўзбекистон халқ шоири, Ёзувчилар уюшмаси раиси Сирожиддин Саййид ва бошқалар Президентимиз Шавкат Мирзиёев ташаббуси билан тобора янгиланиб бораётган Ўзбекистонимизда ёшлар маънавиятини юксалтириш, уларни буюк аждодларимизга муносиб, юртпарвар, ғурурли, садоқатли инсонлар этиб камолга етказиш, билим ва маърифат олиши йўлида зарур барча имконият ва шароитлар эшигини кенг очиб бериш масаласи устувор аҳамият касб этаётганини таъкидлади.

Улғайиб келаётган авлодда эзгу ва олижаноб фазилатларни камол топтиришда жонажон Ўзбекистонимизнинг муқаддас рамзлари бетакрор ўринга эгадир. Тадбирда таъкидланганидек, мана бир неча йилдирки, Ўзбекистон Республикаси Давлат герби, байроғи, мадҳияси қабул қилинган кунларни айрича шодумонликда, кўтаринки руҳда, янада баланд кайфиятда нишонлаш анъанаси шаклланди. Бу эса кўксида Ватан деган номни олиб юришни юксак шараф билган барча ҳамюртларимиз маънавий ҳаётида ўзига хос аҳамият касб этиши шубҳасиз. 2 июль куни ҳам юртимиз фуқаролари учун унутилмас санага айланган.

Бундан роппа-роса 29 йил муқаддам мамлакатимизнинг “Ўзбекистон Республикаси Давлат герби тўғрисида”ги қонуни қабул қилинди. Унда Ўзбекистон Республикаси Давлат герби Ўзбекистон Республикаси давлат мустақиллигининг рамзи экани устувор ўрин эгаллайди. Гербимиз мадҳиямиз, байроғимиз каби эркимиз, бахтимиз, ғуруримиз, порлоқ истиқболимиз, ўзлигимиз тимсоли ҳамдир. Ватан тарихи, халқимизнинг эзгу орзу-умидлари, беғубор интилишларимиз акс этгани боис ҳам барчамиз гербимиздан куч-қудрат оламиз. Унда тасвирланган ҳар бир тимсол қалбимизга туташдир. У тобора сайқал топиб бораверади.

Пурвиқор тоғлар адолат ва ғурур, барчага баробар нур сочаётган қуёшимиз – сўнмас ҳарорат, ободлик, бағрикенглик, тўкинликка ишора. Гербдаги “Ўзбекистон” сўзи ҳар биримизнинг юрагимиздан ўрин олган, энг қадрли сўз, десак муболаға бўлмайди. Давлат рамзлари Ватан равнақи, юрт тинчлиги, халқимиз ҳамжиҳатлиги йўлида барчамизни бирлаштириши билан ҳам қадрлидир. – Ватан тимсоллари биз учун ғурур ва ор демакдир, – деди Ўзбекистон Республикаси Қуролли Кучлар ҳарбий хизматчиси Жаҳонгир Усмонов. – Уларни муқаддас билиш, эъзозлаш чин инсоний, ҳам ватанпарварлик бурчимиздир. – Аждодларимиз бугунгидек ёруғ ва фаровон, озод ва саодатманд кунларнинг орзусида армон билан ўтганлар, – деди Ички ишлар вазирлиги академияси курсанти Аббосбек Мустафоев. – Гербимиз байроғимиз, мадҳиямиз каби ғоят чиройли, қалбга жуда яқиндир.

Унда шонли тарих, истиқлолга эришган ёруғ кунларимиз, нурли келажак ўз аксини топган. Ватан рамзлари бизларни улуғ мақсадлар сари ҳамиша даъват этиб туради. Тантанали тадбирда она-Ўзбекистонимиз, мустақиллигимиз, ёшларга кўрсатилаётган улкан меҳр ва эътибор, бунёдкор халқимизни тараннум этувчи куй-қўшиқлар янгради. Ҳарбий бадиий жамоалар, эстрада юлдузлари, ёзувчи ва шоирлар, таниқли санъаткорларнинг чиқишлари кечага янада тантанавор руҳ бағишлади.