1974 йилда Ғузор туманининг Эшонқудуқ қишлоғи ҳудудидаги тўқай ва чангалзорлар бағрида ўта истиқболли деб топилган янги газ қудуғи очилган эди. Шу билан бирга ушбу қудуқ негизида газни йиғиш ҳамда қайта ишлаш имконини берадиган янги корхона қуришга киришилди.

Мамлакатимиз ёқилғи-энергетика соҳасидаги энг йирик ва стратегик аҳамиятга эга корхоналардан бири — Шўртан нефть ва газ қазиб чиқариш бошқармаси ана шу тахлитда бунёд этилиб, 1980 йилнинг 2 ноябрь куни ишга туширилган. Бу йил ана шу қутлуғ санага 45 йил тўлди.

Ана шу сана муносабати билан Шўртан нефть ва газ қазиб чиқариш бошқармасида тантанали байрам тадбири ташкил этилди. Унда Энергетика вазирлиги, “Ўзбекнефтгаз” АЖ ҳамда Қашқадарё вилоят ҳокимлиги масъуллари, соҳа фахрийлари сўзга чиқиб, корхона жамоасини байрам билан қутлашди. Ўтган йиллар ичида корхона жамоасининг босиб ўтган шонли йўли, эришилган ютуқлар, амалга оширилаётган янги лойиҳалар ҳақида сўз юритилди.

Таъкидланганидек, бугунги кунда корхона томонидан 14 та газ-конденсат конлари ўзлаштирилган бўлиб, улардан йилига ўртача 8 миллиард метр куб газ ҳамда 400 минг тонна газ конденсати қазиб чиқарилмоқда. Бу мамлакатимизда олинаётган газнинг қарийб 20 фоизи, газ конденсатининг эса 30 фоиздан ошиғи айнан Шўртан нефть ва газ қазиб чиқариш бошқармаси томонидан қазиб олинмоқда, деганидир.

— Ушбу хом ашёни шу ернинг ўзида қайта ишлаш орқали бир қатор маҳсулотлар, жумладан, табиий газ, газ конденсати, суюлтирилган газ (пропан-бутан аралашмаси), олтингугурт ҳамда техник кислород ишлаб чиқарилади, — дейди корхонанинг етакчи муҳандис-технологи Дилнавоз Қораева. — Бугунги кунда ишлаб чиқаришда энг замонавий технологиялардан фойдаланилмоқда. Бу эса иш самарадорлиги ҳамда маҳсулотнинг сифат кўрсаткичларини янада оширяпти.

Айни пайтда корхонада 3740 нафар ходимлар меҳнат қилишмоқда. Тадбирда узоқ йиллар шу ерда меҳнат қилган, ўзининг билими, тажрибаси, шижоати билан корхона юксалишига салмоқли ҳисса қўшиб келаётган бир гуруҳ ишчи-ходимларга корхона раҳбариятининг ташаккурномаси ва қимматбаҳо совғалари топширилди.

Жаҳонгир БОЙМУРОДОВ,

“Халқ сўзи”