«Гендер тенглик фаоли» миллий танлови эълон қилинди

18:23 29 Октябр 2020 Жамият
282 0

Ўзбекистон Республикаси Гендер тенгликни таъминлаш масалалари бўйича комиссияси ҳамда Маҳалла ва оилани қўллаб-қувватлаш вазирлиги билан ҳамкорликда ташкил этилаётган «Гендер тенглик фаоли» миллий танлови тақдимотига бағишланган тадбир ўтказилди. Унда сенаторлар, вазирлик ва идоралар, БМТнинг Аҳолишунослик жамғармаси, Халқаро меҳнат ташкилоти, БМТ Тараққиёт дастурининг юртимиздаги ваколатхоналари вакиллари иштирок этди.

Таъкидланганидек, танловдан кўзланган мақсад – мамлакатимизда гендер тенгликка эришиш масаласига кенг жамоатчилик эътиборини жалб этиш, ушбу йўналишда амалга оширилаётган ишларни сифат жиҳатдан янги босқичга олиб чиқишдан иборат.

Танловда ҳар бир йил якунлари бўйича гендер тенгликни таъминлаш соҳасида юқори натижаларга эришган, ушбу йўналишда жамият ривожи учун ташаббус кўрсатаётган, хотин-қизлар ҳуқуқларини ҳимоя қилиш, тегишли йўналишда долзарб вазифаларни амалга ошираётган вазирликлар, идоралар, нодавлат нотижорат ташкилотлари қатнашишлари мумкин.

Мазкур танлов ҳар бир вазирлик, идора, ташкилотда гендер тенгликни таъминлаш сиёсатини шакллантириш, вазирлик ва идоралар фаолиятига гендер ёндашувларини жорий этишга қаратилган. Шунингдек, гендер тенгликни таъминлаш соҳасида давлат ва нодавлат ташкилотларининг илғор тажрибасини аниқлаш, умумлаштириш ва тарғиб қилиш вазифаси ҳам қўйилмоқда.

Тадбирда «Гендер тенглик фаоли» миллий танловини ўтказиш билан боғлиқ ташкилий масалалар кўриб чиқилди. Ўз навбатида, иштирокчилар танловни ўтказиш муддатлари, ҳайъат аъзоларини белгилаш, қатнашчиларни саралаш мезонлари ҳамда тақдирлаш маросимини ўтказиш каби масалалар юзасидан ҳам фикрлар алмашдилар.

«Халқ сўзи».

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?