Фото: “Халқ сўзи”

Фарғона вилоятининг энг олис ҳудуди — Фурқат туманида фойдаланишга топширилган тез тиббий ёрдам станциясининг янги биноси қурилиши учун “Ташаббусли бюджет” лойиҳаси орқали 5 минг 148 та овоз тўпланди ва 1 млрд. 200 млн. сўм маблағ ажратилди. Натижада туман аҳлига намунали хизмат кўрсатишга мўлжалланган тез тиббий ёрдам станциясининг муҳташам ва замонавий биноси қад ростлади.

— Тез тиббий ёрдам станцияси 2 та реанимобил ва 7 та тез тиббий ёрдам автомашиналари билан таъминланди, — дейди Фурқат тумани тиббиёт бирлашмаси раҳбари Бунёджон Мелиев. – Шунингдек, 2 та фельдшерлик ва 7 та шифокорлар бригадасидан ташкил топган малакали тиббиёт ходимлари учун барча қулайликлар яратилди. Тезкор интернет, телефон ва радиоалоқа тизимлари йўлга қўйилгани беморларга тез ва сифатли хизмат кўрсатишда янада қўл келади.

Ўз навбатида тиббиёт муассасасида автотранспорт воситалари учун усти ёпиқ тураргоҳ, дорихона, чақириқларни назорат қилиш, дори-дармонларни сақлаш ва тарқатиш ҳамда амбулатор шароитда даволанадиган беморларга биринчи тиббий ёрдам кўрсатиш хоналари ҳам ташкил этилди.

                                                                        Ботир МАДИЁРОВ, “Халқ сўзи”.