Фарғонада 64 миллион сўмлик пақилдоқлар савдосининг олди олинди

19:30 24 Ноябрь 2022 Жамият
477 0

Фото: Халқ сўзи

Янги йил байрами яқинлашгани сайин айрим қўштирноқ ичидаги тадбиркорлар томонидан сифати кафолатланмаган ҳамда хавфлилик даражаси юқори бўлган пиротехника воситаларини ноқонуний олиб киришга бўлган уринишлар сезиларли даражада ортади. Бу ҳолатга қарши божхона органлари ходимлари ҳуқуқни муҳофаза қилувчи идоралар билан ҳамкорликда тизимли равишда кураш олиб бормоқда.

Фарғона вилоят божхона бошқармаси контрабандага қарши курашиш бўлими ходимлари томонидан ўтказилган тезкор тадбир давомида «Водил-Ёзёвон» йўналишида ҳаракатланаётган Р. Ш. бошқарувидаги Cobalt русумли автотранспорт воситаси Ёзёвон тумани ҳудудида тўхтатилиб, белгиланган тартибда холислар иштирокида кўздан кечирилди. Натижада автомашина салони ва юкхонасида хорижда ишлаб чиқарилган ҳамда божхона расмийлаштирувидан ўтганлигини тасдиқловчи ҳужжатлари бўлмаган 31,6 миллион сўмлик пиротехника воситалари борлиги аниқланди.

Шунингдек, бошқарманинг»Ўзбекистон» чегара божхона постида ДХХ Чегара қўшинлари ходимлари билан ҳамкорликда пиёда ҳаракатланаётган Э.Ф.га тегишли юклар текширилди. Ва бу юклар орасида ҳеч қандай ҳужжатсиз 32,3 миллион сўмлик пиротехника воситаси борлиги фош этилди.

Айни пайтда ушбу ҳолатлар бўйича божхона органлари томонидан терговга қадар текширув ҳаракатлари олиб борилмоқда.

Ботир МАДИЁРОВ, «Халқ сўзи».

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?