Фото: Халқ сўзи

Фарғона жамоат саломатлиги тиббиёт институти ректори Акмал Сидиқов раҳбарлигидаги делегациянинг Ҳиндистонга амалга оширган ташрифи доирасида Гуруграм давлат университети билан ҳамкорлик шартномаси имзоланди.

Шу тариқа икки олий таълим муассасаси ўртасида фармацевтика йўналишида қўшма факультет ташкил этилади. Талабалар икки йил Фарғона жамоат саломатлиги тиббиёт институтида, икки йил Гуруграм давлат университетида соҳа бўйича таҳсил олиш имконига эга бўлишади. Факультет битирувчиларига икки томонлама диплом бериш амалиёти жорий этилади.

Ташриф асносида хорижий инвестицияни жалб этиш ва ҳиндистонлик талабаларнинг Ўзбекистон олий таълим тизимига қизиқишини ошириш мақсадида Деҳли шаҳрида Фарғона жамоат саломатлиги тиббиёт институтининг махсус офиси ўз иш фаолиятини бошлади.

Шунингдек, Ҳиндистоннинг машҳур шифохоналар тармоқларидан бири “Venkateshwar Hospital” билан ҳамкорлик йўлга қўйилди. Онкология соҳасига ихтисослашган клиникада жигар, буйрак ва бошқа ички органларни кўчириб ўтказиш бўйича мураккаб жарроҳлик амалиётлари ўтказилади. Ҳамкорлик доирасида институтнинг бакалавриат, магистратура ва ординатура босқичида таълим олаётган талабалар, профессор-ўқитувчиларнинг мазкур клиникада бепул тажриба алмашиш, малака ошириш ва илмий-амалий жараёнларда бевосита иштирок этиш имкониятини яратиш режалаштирилмоқда.

Ботир Мадиёров, «Халқ сўзи».