Иллюстратив фото

Европа дипломатияси раҳбари Хосеп Боррелнинг айтишича, Европа Иттифоқида Хитойнинг Россия Федерациясига қурол етказиб бергани ҳақида ҳеч қандай далил йўқ.

У Брюсселдаги Европа Иттифоқи кенгаши йиғилиши якунлари бўйича ўтказилган матбуот анжуманида шундай баёнот берди.

«Менда Хитойнинг Россияга қурол етказиб бергани ва у буни режалаштираётгани ҳақида ҳам ҳеч қандай далил йўқ», дейди Боррел.

Аввалроқ, Хитой Ташқи ишлар вазирлиги матбуот котиби Ван Вэнбинь Украинага қурол етказиб бераётган Хитой эмас, АҚШ эканини айтган эди. У Хитой ўқ-дорилари Россия томонидан Украинада қўлланилгани ҳақидаги хабарлар фонида шундай баёнот берган эди.

Хитой ташқи ишлар вазири Цинь Гангнинг таъкидлашича, Хитой Украинадаги можарода иштирок этмайди ва томонларнинг ҳеч бирига қурол-яроғ бермайди. 

Унинг сўзларига кўра, Украина масаласида Пекин ҳар доим вазиятдан келиб чиққан ҳолда мустақил қарор қабул қилади. Дипломатнинг таъкидлашича, «тинчлик ва уруш ўртасида» Хитой «тинчликни танлайди», «мулоқот ва санкциялар ўртасида» эса «мулоқотни танлайди».

Шу йилнинг февраль ойида АҚШ Хитойни Украинадаги можарода фойдаланиш учун Россияга ҳалокатли қуроллар етказиб берса, бунинг оқибатлари ҳақида огоҳлантирган эди.