Иллюстратив фото

Эрон Ислом инқилоби суди уч намойишчини апелляция бериш имконияти билан ўлимга ҳукм қилди. Бу ҳақда "BBC Forsi" хабар бермоқда.

Адлия идораларига кўра, намойишчилардан бири автомашинада полициячини уриб юборган ва бир неча кишини жароҳатлаган. Яна икки намойишчи ҳуқуқ-тартибот ходимларига қуролли ҳужум қилиш ва қасддан ўт қўйишда айбланмоқда. Эрон ҳукумати айбланувчиларнинг шахсини ошкор қилмаган.

Норвегиянинг "Iran Human Rights" инсон ҳуқуқлари ташкилоти суд қарори қонуний кучга эга эмаслиги ҳақида баёнот бериб, халқаро ҳамжамиятни Эрон ҳукумати ҳукмни амалга оширишга тўсқинлик қилишга чақирган. Ташкилот сўнгги икки ой ичида Эрондаги норозилик намойишлари чоғида 342 киши ҳалок бўлгани ҳақидаги маълумотларни эълон қилди. Ҳуқуқ фаолларининг қайд этишича, қурбонларнинг 43 нафари вояга етмаганлардир.

Аввалроқ, БМТ Инсон ҳуқуқлари бўйича Олий комиссари бошқармаси вакили Жереми Лоуренс Эрондаги намойишчиларни озод қилиш зарурлигини айтган эди.

«Нотўғри» ҳижоб кийгани учун полиция ҳибсга олиши оқибатида вафот этган Маҳса Амини ўлими ортидан мамлакатда оммавий норозилик намойишлари бўлиб ўтмоқда.