Сўнгги кунларда аҳоли орасида электр энергияси ва газ таъминоти билан боғлиқ норозиликлар ортиб бормоқда. Шу сабабдан Энергетика вазирлиги ахборот хизмати раҳбари Элмира Бекмуродова аҳолига мурожаат билан чиқди.

"Куз-қиш даврида, айниқса, шу кунларда ҳаво ҳароратининг кескин пасайиши даврида биз учун асосий вазифа – бу хонадонингиз, шунингдек, шифохоналар, болалар боғчалари, мактаблар каби барчамиз учун ижтимоий аҳамиятга эга бўлган объектларда иссиқлик ва ёруғлик бўлиши учун зарур бўлган барча чораларни кўриш ҳисобланади.

Шуни ишонтириб айтамизки, электр таъминотидаги узилишлар ёки газ таъминоти билан боғлиқ ҳолатлар тўғрисида тўлиқ хабардормиз ва бу вазиятдан қаттиқ хавотирдамиз. Ана шундай вазиятларда таъмирлаш гуруҳлари ҳамда жалб қилинган мутахассислар зудлик билан юзага келган муаммоларни бартараф этиш бўйича ишларни олиб бормоқдалар. Вазиятни тўлиқ мониторинг қилиб, доимий равишда назоратга олиб бормоқдамиз", дейди Элмира Бекмуродова.

Эслатиб ўтамиз, аввалроқ, Электр таъминотидаги узилишларнинг асосий сабаблари нимада эканлиги ҳақида мутасаддилар жавобларини эълон қилган эдик.