Фото: Reuters

Буюк Британия бош вазири Риши Сунак агар қаттиқ чоралар кўрилмаса, ноқонуний муҳожирлар тўлқини Европани қамраб олиши ҳақида огоҳлантирди. Бу ҳақда у Римда бўлиб ўтган тадбирда айтиб ўтди.

Италиялик консерваторлар билан учрашувда у қочқинларга нисбатан халқаро қоидаларни қатъийлаштириш зарурлигини таъкидлади.

“Агар биз бу муаммони ҳал қилмасак, уларнинг сони ошиб боради”, деди Сунак.

Бош вазир Буюк Британиядаги муҳожирлар тўлқинининг ҳаддан ташқари юқори даражасига эътибор қаратган. Лондон қонуний миграцияни камайтириш чораларини кўришда давом этиши керак, деб ҳисоблайди у.

Хусусан, Бош вазир хорижлик талабаларнинг Буюк Британияда таълим олиши тўғрисидаги фармонга эътибор қаратди. Унга кўра, 2024 йил январь ойидан бошлаб хорижлик талабалар ўқиш муддати давомида яқинларини мамлакатга олиб кела олмайди. Расмий маълумотларга кўра, 2022 йилда қиролликка 745 мингга яқин хориж фуқароси келган.