Юртимиз ёшларида замонавий фанларни, жумладан, дастурчилик, дизайнерлик, хорижий тилларни ўрганишга иштиёқ катта. Ғиждувон туманидаги чекка гўшалардан бири саналган Оқработ қишлоғида ўтказилган ўзига хос сўровнома ҳам худди шуни кўрсатди. Туман марказидан чамаси 18 километр узоқликдаги мазкур гўша ва ён-атрофдаги маҳаллаларда яшовчи етти минг нафардан зиёд ўғил-қиз айнан шу йўналишларда сабоқ олиш истагини билдирди.

Ёшлар талаб-истакларидан келиб чиқиб, бу ерда «IT–шаҳарча» барпо этилди. Масканда ёш авлод вакиллари замонавий фан сирларини бепул ўрганибгина қолмай, IT хизматлари кўрсатиш, фрилансерлик билан шуғулланиш, стартаплар тайёрлаш борасида маълум бир кўникмалар ҳосил қилишади.

— Рақамли технологияларни чуқур ўзлаштириш кўп жиҳатдан хорижий тилни билишга боғлиқ, — дейди мазкур масканда ёшларга сабоқ бераётган инглиз тили ўқитувчиси Ситора Музаффарова. — Шогирдларимиз буни яхши англаган ҳолда машғулотларга фаол қатнашишмоқда. Жамоамиз ўзига билдирилган ишончни оқлайди, албатта.

«IT–шаҳарча» бир мавсумда 180, йил давомида эса 700 нафардан кўпроқ ўғил-қизни қамраб олиш имкониятига эга.

Истам ИБРОҲИМОВ, «Халқ сўзи».