Куз-қиш мавсумида аҳолининг турмуш сифати ва фаровонлигини ошириш, энергия ресурсларидан оқилона фойдаланиш ҳамда уй-жойларда иссиқлик тизимларининг барқарор ишлашини таъминлаш мақсадида Андижонда кенг кўламли инфратузилма лойиҳалари амалга оширилмоқда. Бобур шаҳридаги кўп қаватли уйларда истиқомат қилувчи аҳоли учун замонавий иссиқлик таъминоти тизими мавсумий фаолиятини бошлагани бунга мисолдир. Туркиянинг “MIMSAN GRUP” компанияси технологияси асосида жорий этилган мазкур тизим энергия тежамкор, экологик хавфсиз ва юқори самарадорликка эга ускуналар билан жиҳозланган.

— Бу тизим орқали нафақат уйлар иссиқ, балки кўнглимиз ҳам тинч, — дейди ушбу манзилда истиқомат қилувчи Ферузахон Худойқулова. — Сабаби, у хавфсиз, экологик жиҳатдан тоза ва узлуксиз ишлайди. Шу боис қиш фаслида болалар ҳам, катталар ҳам совуқдан азият чекмайди.

Қуввати 21 мегаватт бўлган иссиқлик маркази 2 минг хонадонни иссиқлик энергияси билан таъминлаш имкониятига эга. Электромагнит фильтрация тизимлари орқали атроф-муҳитга зарарли газлар чиқишига йўл қўйилмайди. Янги тизим ишга туширилиши натижасида ҳар мавсумда минглаб киловатт соат электр энергияси ҳамда юзлаб куб метр табиий газни тежаш имкони яратилди.

Саминжон ҲУСАНОВ

(«Халқ сўзи»)